Ndotje nga vaji i lulediellit në Detin e Zi pas sulmeve ruse në Odessa 24/12 21:21
Demonstratat antiqeveritare shpërthyen të shtunën në disa vende anembanë Iranit, ndërsa protestat më të qëndrueshme në vite kundër një teokracie të rrënjosur thellë hynë në javën e tyre të katërt. Të paktën dy persona u vranë.
Protestuesit bënin thirrje kundër qeverisë dhe rrotulluan shamitë e kokës në kundërshtim të kodeve të detyrueshme fetare të veshjes. Në disa zona, tregtarët mbyllën dyqanet në përgjigje të thirrjes së aktivistëve për grevë ose për të mbrojtur mallrat e tyre nga dëmtimi.
Protestat filluan më 17 shtator, pas varrimit të 22-vjeçares Mahsa Amini, një vajze kurde e cila kishte vdekur ndërsa mbahej në paraburgim nga policia e moralit. Ajo ishte arrestuar për një shkelje të dyshuar të kodeve të rrepta islame të veshjes për gratë. Që atëherë, protestat u përhapën në të gjithë vendin dhe u pritën me ashpërsi nga autoritetet. Vlerësohet se dhjetëra persona janë vrarë dhe qindra të tjerë janë arrestuar.
Në qytetin Sanandaj në rajonin verior me shumicë kurde, një person u qëllua për vdekje të shtunën teksa po udhëtonte me makinë në një rrugë kryesore, thanë monitoruesit e të drejtave të njeriut. Rrjeti i të Drejtave të Njeriut të Kurdistanit me seli në Francë dhe Organizata Hengaw për të Drejtat e Njeriut, thanë se personi u qëllua pasi i ra borisë ndërsa forcat e sigurisë ishin të dislokuara nëpër rrugë. Rënia e borive është bërë një nga mënyrat se si aktivistët kanë shprehur mosbindje civile. Videoja që qarkullon në internet tregon personin e vrarë mbi timon, ndërsa dëshmitarët e shqetësuar bërtisnin për ndihmë.
Agjencia gjysmë-zyrtare e lajmeve Fars, që besohet se mbështet forcën elitare paraushtarake Gardën Revolucionare Islamike, tha se shefi i policisë së Kurdistanit hodhi poshtë njoftimet për përdorimin e drejtpërdrejtë të armëve kundër protestuesve.
Agjencia Fars pretendoi se njerëzit në rrugën Pasdaran, të qytetit Sanandaj, thanë se viktima u qëllua nga brenda makinës, pa dhënë detaje të mëtejshme. Por fotot e të vdekurit tregojnë se ai është qëlluar nga ana e majtë, që do të thotë se ka të ngjarë të mos jetë qëlluar nga brenda makinës. Gjaku mund të shihet që rrjedh nga brenda derës në anën e shoferit.
Një protestues i dytë u vra pasi forcat e sigurisë qëlluan me armë për të shpërndarë turmat në qytet dhe 10 protestues u plagosën, thanë monitoruesit e të drejtave të njeriut.
Një grevë e përgjithshme u pa në rrugët kryesore të qytetit mes një pranie të madhe sigurie dhe protestuesit dogjën goma në disa zona. Patrullat kanë penguar grumbullimet masive në Sanandaj, por protestat e izoluara kanë vazhduar në lagjet me popullsi të dendur të qytetit.
Demonstrata u raportuan gjithashtu në kryeqytetin Teheran të shtunën, përfshirë grumbullime më të vogla pranë Universitetit të Teknologjisë Sharif, një nga qendrat kryesore të arsimit në Iran dhe skena e një shtypjeje të dhunshme nga qeveria fundjavën e kaluar. Autoritetet kanë mbyllur kampusin deri në një njoftim të dytë./VOA
Top Channel
