Udhëzimet e reja të BE zbusin sanksionet ndaj importimit të qymyrit rus në vende ‘të treta’ (fotot)

Rrjeti Bloomberg shkruan se zhvillimi vjen teksa vende anëtare si Polonia dhe disa vende të Balltikut kanë kritikuar udhëzimet e reja nga një takim i ministrave të BE dhe kanë kërkuar që publikimi i tyre të pezullohet deri në qartësimin e çështjes.

Sipas udhëzimeve të reja nga krahu ekzekutiv i BE, Komisioni Evropian, duhet lejuar lëvizja e disa mallrave të caktuara, si për shembull qymyri dhe nënproduktet e tij drejt vendeve te tjera, “për të luftuar pasigurinë e energjisë dhe ushqimit në botë”.

Më parë komisioni kishte thënë se ndalohej transferimi i qymyrit dhe shërbimet e tjera si ato financiare e të sigurimeve për mallrat që vinin nga Rusia.

Disa vende anëtare thonin se udhëzimet e reja nuk ishin të koordinuara me to prandaj është ngritur një ankesë për rishikim, sidomos me artikuj që nuk janë të lidhur drejtpërdrejt me sigurinë ushqimore.

“BE është e përkushtuar që sanksionet e saj të mos ndikojnë negativisht për mallrat bazë në vendet e tjera jashte BE”, tha zëdhënesi i KE Daniel Ferrie duke saktësuar se sqarimi ka të bëjë me kimikate të përdorur si fertilizues, mallra energjitike dhe disa mallra specifike esenciale.

“Financimi dhe ndihma e operatorëve të BE për transportin drejt vendeve të treta për mallra të tilla si produktet e përmendura, është gjithashtu i lejuar”, shtonte Ferrie në deklaratë.

Qymyri dhe nënproduktet e tij ishin të theksuara në udhëzimin e Komisionit.

Më herët BE kishte pranuar të mos sanksiononte produktet esenciale bujqësore, sipas saj për të kundërshtuar propagandën ruse se sanksionet po rrisnin çmimet e ushqimeve ne bote.

“Asnjë nga sanksionet e BE nuk shënjestron tregtinë e Rusisë me vende të treta jashtë BE,” shtonte Ferrie duke thënë se ndalimi importit të qymyrit drejt BE mbetet në fuqi.

Top Channel