Gjykata e Lartë nuk do ta lejojë Bidenin të zbatojë politikën e imigracionit

Urdhri i gjykatës të enjten e lë politikën të pandryshuar për momentin në mbarë vendin. Votimi ishte 5-4 me gjyqtaren konservatore Amy Coney Barrett që u bashkua me gjyqtaret liberale Sonia Sotomayor, Elena Kagan dhe Ketanji Brown Jackson duke thënë se do të kishin lejuar administratën Biden të vinte udhëzimin në zbatim.

Gjykata njoftoi gjithashtu se do të dëgjonte argumentet për çështjen në fund të nëntorit.

Gjyqtarët po vepronin sipas kërkesës urgjente të administratës drejtuar gjykatës pas vendimeve kontradiktore të gjykatave federale të apelit mbi një direktivë të shtatorit nga Departamenti i Sigurisë Kombëtare që ndalonte deportimin nëse individët nuk kishin kryer akte terrorizmi, spiunazhi ose “kërcënime skandaloze për sigurinë publike”.

Gjykata federale e apelit në Cincinnati në fillim të këtij muaji përmbysi urdhrin e një gjyqtari të qarkut që e vendosi politikën në pritje në një padi të ngritur nga Arizona, Ohio dhe Montana.
Por në një padi të veçantë të ngritur nga Teksasi dhe Luiziana, një gjykatës federal në Teksas urdhëroi një ndalim mbarëkombëtar të udhëzimit dhe një panel federal apeli në New Orleans refuzoi të ndërhynte.

Në dosjen e tyre në Gjykatën e Lartë, Teksasi dhe Luiziana argumentuan se udhëzimi i administratës shkel ligjin federal që kërkon ndalimin e njerëzve që ndodhen në SHBA ilegalisht dhe që janë dënuar për krime të rënda. Shtetet thanë se do të përballeshin me kosto të shtuara për të ndaluar njerëzit që qeveria federale mund t’i lejonte të qëndronin të lirë brenda Shteteve të Bashkuara, pavarësisht të dhënave të tyre kriminale.

Udhëzimi, i lëshuar pasi zoti Biden u bë president, përditësoi një politikë të epokës Trump që dëbonte njerëzit që ishin në vend në mënyrë të paligjshme, pavarësisht nga historia kriminale ose lidhjet me komunitetin./Voa

Top Channel