Lëkundje të forta tërmeti në Iranin jugor, të paktën 5 të vdekur

02/07/2022 10:16

Një seri tërmetesh të forta tronditën Iranin jugor të shtunën, duke vrarë të paktën pesë persona dhe duke shkaktuar dëme në dhjetëra ndërtesa, njoftuan mediat shtetërore.

Tërmetet, duke përfshirë dy me magnitudë 6.0, goditën në perëndim të qytetit port të madh të Bandar Abbas në provincën Hormozgan, tha Shërbimi Gjeologjik i SHBA.

I pari tronditi një zonë në veri të qytetit të Dezhgan pak pas orës 2:00 të mëngjesit përpara se një tërmet 5.7 të godiste dy orë më vonë, i ndjekur shpejt nga tërmeti i tretë me magnitudë 6.0.

Guvernatori i Hormozganit, Mehdi Dousti tha se pesë persona u vranë, siç citohet nga agjencia zyrtare e lajmeve IRNA.

Dousti tha se shumica e dëmeve kanë ndodhur në fshatin Sayeh Khosh, afër epiqendrës.

Televizioni shtetëror tha se 49 persona u plagosën dhe shfaqi pamjet e ndërtesave të banimit të kthyera në rrënoja në Sayeh Khosh.

Ambulancat dhe automjetet e tjera u përpoqën të kalonin në rrugët e mbuluara me mbeturina, ndërsa banorët e tronditur dolën në rrugë ose u përpoqën të rikuperonin gjëra nga shtëpitë e rrafshuara.

Njerëzit gjithashtu e kaluan natën jashtë në kryeqytetin e provincës Bandar Abbas, me një popullsi prej më shumë se 500,000 banorësh, që ndodhet rreth 100 kilometra në lindje të epiqendrave, ku u krijuan radhë të gjata përpara pikave të karburantit, raportoi media shtetërore.

Irani qëndron përtej kufijve të disa pllakave kryesore tektonike dhe përjeton aktivitet të shpeshtë sizmik.

Tërmeti më vdekjeprurës i këtij shteti ishte një tërmet me magnitudë 7.4 në vitin 1990 që vrau 40,000 njerëz në veri, plagosi 300,000 dhe la gjysmë milioni të pastrehë.

Top Channel