NATO, shtim gjigant forcës së sigurisë/ Tërbohen rusët, raketa mbi qendrën tregtare!

Sekretari i përgjithshëm, Jens Stoltenberg njoftoi se nga 40 mijë trupa të tilla, që aleanca numëron aktualisht, ky numër llogaritet të shkojë në 300 mijë.

“Ne do ta transformojmë forcën e reagimit të NATO-së, duke e çuar numrin e saj në më shumë se 300 mijë. Kjo nismë e re ushtarake do ta forcojë në mënyrë drastike mbrojtjen e krahut lindor të aleancës”.

Ky është rishikimi më i mad hi mbrojtjes së NATO-s që nga koha e Luftës së Ftohtë. Vendimet do të zyrtarizohen në samitin historik të aleancës 30-anëtare të NATO-s këtë javë në Madrid, i cili po mbahet nën hijen e luftës së Rusisë në Ukrainë. Në samitin e Madridit, NATO do të ndryshojë gjithashtu qasjen e saj ndaj Rusisë, e cila në strategjinë e fundit të aleancës nga viti 2010 ishte ende e përshkruar si një partner strategjik.

Në ditën kur Stoltenberg bënte këtë deklaratë të fortë, forcat e Moskës treguan se brutaliteti i sulmit të saj në Ukrainës, është ende larg fashitjes. Të paktën dy vetë u vranë e mbi 20 të tjerë u plagosën nga një sulm me raketa mbi një qendër tregtare të qytetit Kremenchuk, në qendër të Ukrainës. Presidenti Volodymyr Zelensky tha se në ato momente, në godinë ndodheshin më shumë se 1000 vetë, ndërsa la të kuptohet se numri i viktimave mund të jetë edhe më i madh se ai i njoftuar për momentin. Më herët, Zelensky kishte përmendur dhe afat kohor se kur duhet të përfundojë lufta.

Lufta me Rusinë duhet të mbyllet përpara dimrit. Na nevojiten sisteme të mbrojtjes anti-ajrore, na duhet ndihmë për rindërtimin e vendit, ndihmë për eksportet e grurit dhe garanci sigurie. Sanksionet mbi Rusinë gjithashtu duhen intensifikuar edhe më shumë.

Komentet e tij, Zelensky i bëri virtualisht në samitin e shtatë vendeve më të industrializuara të botës, G7, ku insistoi që lufta të përfundojë para fundit të vitit pasi siç tha, kushtet e motit në atë periudhë do ta bënin më të vështirë përballjen në fushëbetejë.

Top Channel