Rreth 20 efektivë zjarrfikës morën pjesë në një operacion stërvitor kompleks për të testuar përgatitjen për ndërhyrjet në rast zjarri në banesa dhe sidomos në zona me vështirësi për hyrjen e mjeteve siç është zona historike e Gjirokastrës.
Zjarret aksidentale në zonën e pazarit dhe lagjet e sipërme kanë rezultuar të rrezikshme dhe me mundësi të lartë shtrirjeje në banesa të tjera.
Shkak për vështirësitë e ndërhyrjes janë bërë kanalizimet e ujësjellësit që kanë mbajtur jashtë funksionit prej më shumë se një viti tashmë shumë rrugë të brendshme si dhe prania e kabllove ajrore të energjisë apo shërbimit të internetit.
Situata e mjeteve në dispozicion dhe logjistikës mbështetëse është më e mirë këtë vit ndërsa mbështetja me mjete dhe efektivë prej bashkive fqinje dhe anasjelltas është detyrim ligjor.
Situata dramatike e zjarreve vitin e kaluar në Gjirokastër në njësitë administrative përreth ka lënë pas hapësira të gjera të shkrumbuara ku u kërcënuan seriozisht disa fshatra në Lunxhëri e Antigone si dhe u shënuan 2 viktima.
Bashkia njoftoi vitin e kaluar se nuk do të rinovojë kontratat me barinjtë në territoret ku do të ketë zjarre masë që është ende në fuqi këtë vit.
Në shumicën e rasteve zjarrvëniet kanë qenë të qëllimshme dhe vetëm gjatë 5-vjeçarit të fundit qarku i Gjirokastrës ka pësuar dëme në disa mijëra hektarë territor të kultivuar përveç dëmeve në prona dhe jetëve të humbura.
Top Channel
