“Kërkoj shpalljen fajtor të Thoma Gëllçit, ish drejtor i përgjithshëm të Radio Televizionit Shqiptar i dyshuar se shpërdoroi detyrën”, deklaroi prokurorja Doloreza Musabelliu para gjykatës në mbyllje të hetimeve disa mujore.
Sipas pretencës së SPAK, Gëllçi duhet të dënohet me dy vjet e gjashtë muaj burgim dhe që në aplikim të gjykimit të shkurtuar ky dënim të zbresë në 1 vit e tetë muaj burgim.
Ndërkohë për akuzën e shkeljes së barazisë në tendera u kërkua dënimi i tre anëtarëve të komisionit të vlerësimit të ofertave Alban Malaveci, Julian Tapia dhe Ervin Muraj ku secili në aplikim të gjykimit të shkurtuar sipas SPAK duhet të vuajë nga një vit burgim.
Thoma Gëllçi u prangos me urdhër të prokurorisë së posaçme në tetor të vitit të kaluar si i dyshuar për tenderin e pajisjeve për kanalin RTSH Agro me vlerë 87 milionë lekë të reja.
I mbajtur gjatë 2018 ky tender u konstatua me shkelje duke nisur që nga shpallja e procedurës, mbas lidhjes së kontratës në dhjetor , u caktua si kusht afati 45 ditor, por sipas SPAK një javë mbas përfundimit të këtij afati , ish drejtori i përgjithshëm firmosi shtesë kontrate.
Top Channel
