Në 23-vjetorin e masakrës në Studime të Vushtrrisë, familjarët kanë përkujtuar të dashurit e tyre, të cilët u morën me dhunë dhe u vranë nga forcat kriminele serbe.
23 vjet më parë banorët e Studimes panë tmerrin me sytë e tyre, kur forcat serbe vranë 116 shqiptarë të pafajshëm.
Këta të fundit u nxorën nga kolona e qindra njerëzve që kishin marrë rrugë për Shqipëri. Nga dëshmitarët mësohet se 116 civilët u pushkatuan brenda dy orëve.
Nëna Hatixhe Ferati përkujton me lot në sy momentet e fundit me më të dashurit e saj, të cilët iu vranë në këtë masakër.
“Na i morën prej dore, nëpër ta shkelnim aty, nuk guxonim të afrohemi, t’i marrim, as t’i shohim apo t’i prekim. Dolëm disa andej. Kisha edhe plakin me vete pasi nuk mund të ecte, fëmijët dhe vajzat, krejt ashtu. Këta i ndalën. Nëna si të dalë e të shkojë?… Kurrë nuk më hiqen nga mendja, qysh po e shihje fëmijën, veç Allahu që i dërgoi këta të shkretë”, tha ajo për Kosovapress.
Musa Gërguri, një tjetër familjar, i cili në këtë masakër humbi vajzat e tij 16 dhe 20 vjeç dhe motrën 23-vjeçare tha se do t’i kujtojë gjithmonë, ndërsa mbetet me shpresën se masakra të tilla të mos ndodhin më.
“Shpresoj të mos ndodhë kurrë më siç ka ndodhur… Pesë janë, dy vajza i kam edhe motrën… Njëra 20 vjeç e tjetra 16-vjeçe, motra 23-24 vjeç. Çka kemi të bëjmë, duhet të pajtohemi”, tha ai.
Ndërsa Isa Gërguri thotë se po presim nga institucionet të vendoset drejtësi për autorët e këtyre krimeve makabre.
“Tmerr ka qenë, veç nuk kemi çfarë të bëjmë. Atë natë në kolonë kemi qenë, por kush ka pasur ymër ka jetuar, kush nuk ka pas e kanë mbytur. Motra ka qenë 25-vjeçare, vajza e vëllait 20-vjeçare dhe mixha ka qenë diku 63-vjeçar… Jeta e ka kështu. Ata (kriminelët serbë) po sillen të lirë, i njohim shumicën, po presim derisa të vendoset diçka”, tha ai.
Masakra në Studime të Vushtrrisë nga krerët e institucioneve të Kosovës është quajtur ndër masakrat më të tmerrshme ndaj shqiptarëve gjatë luftës.
Top Channel
