Shkatërrohet një laborator droge në Zveçan, arrestohen katër serbë

Operacioni është kryer në fshatin Kremestak, pasi Policia kishte marrë informacion se në një shtëpi dyshohej se kishte një laborator për kultivimin e kanabisit.

Gjatë kontrollit në brendësi të shtëpisë, u zbulua se në katin e parë kishte dy dhoma të rregulluara me ndriçim, ventilim dhe saksi, dhe një dhomë në të cilën kishte bimë kanabis duke u tharë dhe pothuaj të gatshme për treg. Edhe në katin e dytë ndodhej një dhomë me bimë të kanabisit duke u tharë po ashtu të gatshme për shitje,

Sipas Policisë, janë konfiskuar 15 kilogramë marijuanë, e gatshme për tu hedhur në treg, kanabis, para të gatshme dhe sende të tjera.

Vlerësohet se sasia e sekuestruar e marijuanës dhe bimëve të kanabisit e kalon vlerën e shitjes në treg mbi një milion euro, ndërsa pajisjet të cilat janë përdor për mbjelljen, rritjen dhe kultivimin e kanabisit kalojnë vlerën e mbi 450,000 euro.

Policia thotë se bëhet fjalë për një grup të strukturuar kriminal të cilët kanë vepruar në shitjen e narkotikëve në Republikën e Kosovës dhe në Serbi.

Autoritetet njoftuan se të arrestuarit,  kishin tentuar të iknin në momentin që Policia e Kosovës kishte hyrë në shtëpinë ku u gjet laboratori, por pa sukses.

Top Channel