Një i ri, i identifikuar si Egzon Isufi, banues në Kosovë është kapur nga policia e Gjirokastrës teksa po transportonte 64 emigrantë të paligjshëm nga vendet e treta, kundrejt fitimit.
Në afërsi të fshatit Dervician, Gjirokastër, shërbimet e Policisë, pas informacioneve të siguruara në rrugë policore, i kanë bërë shenjë ndalimi furgonit që po drejtohej nga i riu, i cili nuk i është bindur, por është larguar me shpejtësi, duke braktisur automjetin.
Pas disa minutash ndjekje, drejtuesi i mjetit, është vënë në pranga nga shërbimet e Policisë ndërsa janë shpallur në kërkim dy bashkëpunëtorët e tij të identifikuar si F. M., 34 vjeç, banues në Kosovë dhe E. Z., 27 vjeç, banues në Kukës.
Në cilësinë e provës materiale u sekuestruan automjeti dhe një aparat celular dhe 3.400 euro.
Operacioni policor i koduar “Road Guard 14” u finalizua nga specialistët e Seksionit për Hetimin e Trafiqeve të Paligjshme në DVP Gjirokastër, në bashkëpunim me Sektorin e Policisë Rrugore dhe Seksionin Operacional.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprat penale “Dhënia ndihmë për kalim të paligjshëm të kufirit”, e kryer në bashkëpunim dhe “Mosbindja ndaj urdhrit të punonjësit të policisë së rendit publik”.
Top Channel
