Bisedimet Rusi-Ukrainë/ Zyrtari i lartë ukrainas: Do të fillojmë brenda dy orësh

Delegacionet nga Rusia dhe Ukraina pritet të mblidhen brenda dy orësh për të zhvilluar raundin e dytë të bisedimeve në Bjellorusi, për arritjen e një armëpushimi.

Këshilltar presidencial ukrainas Mykhailo Podolyak konfirmoi me anë të një postimi në Twitter se përfaqësuesit e tyre ishin rrugës.

“Në rrugë për bisedime me Federatën Ruse. Tashmë në helikopterë. Do të fillojmë brenda dy orësh”, shkroi Podolya..

Më herët edhe ministri i Jashtëm rus Sergej Lavrov ka thënë në një video-konferencë se bisedimet do të zhvillohen sot. Ai pretendoi se vonesa për mbërritjen e tyre në Bjellorusi është e qëllimshme nga ana e tyre dhe se Ukraina është një shtet kukull i Shteteve të Bashkuara.

Edhe zëdhënësi i Kremlinit Dmitry Peskov tha se një delegacion rus ishte duke pritur për homologët e tyre ukrainas në Bjellorusi.

“Por, siç e dini, bisedimet nuk kanë filluar. Negociatorët ukrainas nuk po nxitojnë. Le të shpresojmë që ata të arrijnë sot,” shtoi Peskov.

Qëllimi minimal i Kievit është të krijojë korridore humanitare – rrugë për civilët për t’i shpëtuar zonave të goditura nga konflikti. Faktor ky që vjen prej faktit se numri i njerëzve që largohen nga Ukraina arrin në një milion, ndërsa Moska vazhdon të rrethojë më shumë qytete.

Ndërsa ministri i Jashtëm i Rusisë Sergej Lavrov ka deklaruar se pozicioni negociator i Rusisë është që:

• Ukraina duhet të “çmilitarizohet” dhe “denazizohet”
• Krimea – gadishulli jugor i Ukrainës i aneksuar nga Moska në 2014 – njihet nga Kievi si pjesë e Rusisë
• Dy rajone separatiste në Ukrainën lindore – e vetëshpallur Republika Popullore e Donetskut dhe Republika Popullore e Luhanskut – njihen zyrtarisht

Delegacionet e Rusisë dhe Ukrainës do të takoheshin të mërkurën për një raund të dytë bisedimesh, pas atij të parit të mbajtur ditën e hënë, fatkeqësisht pa ndonjë rezultat.

Top Channel