![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Lituania njoftoi të hënën se do të shesë një fermë që ishte përdorur nga CIA për të torturuar personat e dyshuar për terrorizëm në kohën kur Shtetet e Bashkuara po luftonin në Irak dhe Afganistan.
Prona përfshin një ndërtesë të madhe dykatëshe me shumë dhoma që ndodhet pranë një pylli në veri-lindje të Vilnius, kryeqytet i Lituanisë.
Ndërmjet viteve 2005 dhe 2006 ky vend u përdor nga CIA si një burg sekret në kuadër të të ashtuquajturit “programi i dorëzimit të jashtëzakonshëm”, ku ndaloheshin jashtë ligjit personat e dyshuar si terroristë nga Shtetet e Bashkuara në bashkëpunim me vendet e tjera aleate, në këtë rast Lituanisë.
Mësohet se aty janë marrë në pyetje dhe torturuar persona të dyshuar se kishin informacione të dobishme për të gjetur anëtarët e Al Kaedës ose për të mësuar diçka rreth planeve të tyre.
Një praktikë e tillë u mbajt e fshehtë për disa vite dhe ishte një nga më të diskutueshmet në të ashtuquajturën “luftë kundër terrorizmit” e zhvilluar nga Shtetet e Bashkuara pas sulmeve të 11 shtatorit të vitit 2001 në Nju Jork dhe Uashington nga Al Kaeda.
Gjykata Evropiane e të Drejtave të Njeriut dënoi në vitin 2018 Lituaninë për shkelje të drejtave të njeriut në dy raste.
Mësohet se dy persona të dyshuar si anëtarë të Al Kaedës u arrestuan ilegalisht dhe më pas u torturuan nga CIA.
Top Channel