PD njofton Kuvendin për përbërjen e re të grupit parlamentar: Kemi shkarkuar 4 deputetë

Në shkresë bëhet me dije se deputetët Albana Vokshi, Flamur Noka, Luan Baci dhe Edmond Spaho, me vendim të grupit parlamentar, pas masave disiplinore të marra nga Kryesia e Partisë Demokratike, nuk janë më pjesë e këtij grupi. Kujtojmë se të katërt deputetët e PD kanë qenë në mbështetje të Sali Berishës për shkarkimin e Lulzim Bashës.

Ndër të tjera sqarohet se në mbledhjen e zhvilluar të shtunën, Enkelejd Alibeaj është zgjedhur si kryetar i grupit parlamentar, post që më parë e mbante Alfred Rushaj. Ndërsa Agron Gjekmarkaj është propozuar si nënkryetar i Kuvendit duke zëvendësuar Alibeajn.

Gjithashtu janë propozuar disa ndryshime në Komisionet e Përhershme parlamentare që janë:

-Grida Duma si kryetare Komisioni në Komisionin për Punën, Çështjet Sociale dhe Shëndetësinë.

-Flutura Açka si kryetare për Komisionin për Edukimin dhe Mjetet e Informimit Publik.

-Dhurata Cupi si zv.kryetare e Komisionit për Komisionin për Çështjet Ligjore, Administratën Publike dhe të Drejtat e Njeriut.

PD njofton Kuvendin se në përbërjen e Byrosë së Kuvendit janë miratuar këto ndryshime:

-Sekretariati për Buxhetin. Propozohet si sekretar Xhelal Mziu duke liruar nga detyra Belind Këlliçin.

-Sekretariati për Procedurat, Votimet dhe Etikën. Propozohet si anëtar Bledion Nallbati duke liruar nga detyra Flutura Açkën.

-Sekretariati për Statusin e Deputetit. Propozohet si sekretar Dashnor Sula duke liruar nga kjo detyrë Grida Dumën.

-Sekretariati për Kërkimin Parlamentar, Bibliotekën dhe Botimet. Propozohet si anëtare Lindita Metaliaj duke liruar nga kjo detyrë Dhurata Cupin.

Ndërsa në përbërjen e Këshillave të përhershëm bëhen këto ndryshime:

-Në këshillin e Legjislacionit propozohet si anëtar i përhershëm Dhurata Cupi duke liruar nga detyra Oerd Bylykbashin, i cili propozohet si anëtar zëvendësues.

-Në këshillin për Rregulloren, Mandatet dhe Imunitetin, propozohet si anëtar i përhershëm Ervin Salianji duke liruar nga kjo detyrë Oerd Bylykbashin.

PD njofton se kanë propozuar edhe ndryshime në përbërjen e delegacioneve të përhershme të Kuvendit pranë organizatave ndërkombëtare.

Top Channel