Gripi vret më shumë se omicron/ Në Britani ka parashikime optimiste për pandeminë

Sipas tyre , vdekjet nga shtama e Omicronit janë më pak se gjysma  e atyre të shkaktuara nga një grip i zakonshëm, ndërkohë që  pandemia është duke kaluar drejt endemisë, çka nënkupton fundin e saj. Nga Londra njofton korrespondenti  i Top-Channel, Arben Manaj.

Omicorni mund të jetë madje më pak vdekjeprurës se gripi i zakonshëm, pasi shifrat krahasuese të vdekjeve në Britani aktualisht janë më pak se gjysma e atyre nga gripi i zakonshëm,  dhe sipas eksperteve britanikë  vendi përfundimisht është në prag të mposhtjes së pandemisë.

Momentalisht ka 130 vdekje  nga koronavirusi në Angli e krahasuar me 1300 janarin e kaluar para se vaksina të ishte e disponueshme gjerësisht.

Vdekjet nuk kanë lëvizur thuajse fare që nga vjeshta,  ndërkohë që infektimet janë katërfishuar pas daljes së shtamës super të transmetueshme. Disa ekspertë britanikë gjithmonë kanë argumentuar se coronavirusi eventualisht do mund të shndërrohet në një të ftohtë apo grip sezonal, pasi bota po arrin imunizimin qoftë përmes vaksinimit qoftë infektimit natyral.

Por ekspertët  kanë paralajmëruar se  nuk mund të bazohesh vetëm në kalimin e një gripi apo të ftohti të zakonshëm,  si mbrojtje ndaj covidit dhe marrja e tre dozave  mbetet mënyra më e mirë për vetëmbrojtje.

Një këshilltar i qeverisë së Boris Johnson, thotë se nëse ky trend vazhdon atëherë masat shtrënguese duhen hequr dhe faktikisht qeveria planifikon që masa të tilla si të punuarit nga shtëpia, apo vetizolimet, mund të hiqen në fund të muajit dhe të kalohet drejt atij normaliteti që ekzistonte përpara tetorit të kaluar.

Ekziston një besim në rritje se ky vit do shënoi kalimin përfundimtar të pandemisë drejt endemisë, ose gjendjes përpara daljes së koronavirusit dhe njerëzimi do duhet të jetojë me virusin ose viruset siç pati jetuar përpara 2019-ës.

Top Channel