Në skadim të ultimatumit të vendosur nga Sali Berisha të gjitha hyrjet e shtëpisë së demokratëve ishin mbyllur.
Pesë deputetë demokratë, mbështetës të Sali Berishës, anëtarë të Komisionit të Rithemelimit, dështuan të futeshin brenda selisë blu.
“Gjithçka e blinduar, e ka kthyer partinë në një burg të sigurisë së lartë, Alkatraz modern, kjo është e turpshme, kjo është e neveritshme”, tha Noka.
Por, numri dy i PD-së, Gazment Bardhi mohoi akuzat dhe foli për rregulla të reja për futjen në seli të zyrtarëve demokrat. Përjashtim bën vetem Lulzim Basha, të cilit dyert e selisë iu hapën pa leje.
“Nëse ti vjen tek dera dhe nuk njofton, sigurisht do jetë mbyllur, duhet të njoftojnë administratën e partisë. Brenda po kryhen punime. Absurdi i lëvizjes së Berishës ishte se e nisi betejën për të rrëzuar Ramën dhe po e mbyll me protestë kundër”, u shpreh Bardhi.
Të dyja palët po përgatiten për protestën e së shtunës. Por çfarë pritet të ndodhë më 8 janar?
“Deri sot kishte afat për të zbatuar parimin numër 1 të demokracisë, votën dhe verdiktin e shumicës më datë 8 sovrani e kthen godinën nga Alkatraz të Edi Ramës në shtëpi të lirisë”, tha Noka.
“S’do të kërkojmë mbrojtje nga policia. Të gjitha institucionet e Partisë Demokratike do jenë në seli. Kjo godinë s’mund të jetë vendstrehim për trafikantët e drogës që kërkohen në Britaninë e Madhe, por që shfaqen krah Berishës, në shëtitjet e tij turistike në selinë e PD-së”.
Top Channel
