Sulmi terrorist në Gjermani, publikohet fotoja e autorit të dyshuar 21/12 21:09
Franca do të forcojë kufizimet, por nuk do të vendosë shtetrrethim ose bllokime përpara festimeve të Vitit të Ri, pavarësisht raportimit të rasteve të reja rekord të koronavirusit. Lajmin e bëri të ditur kryeministri francez Jean Castex në një konferencë shtypi ditën e sotme.
“Në këtë fazë, vullneti ynë është që të përshtatim planet tona në një mënyrë proporcionale që na lejon të përjashtojmë çdo masë shtetrrethimi”, tha Castex pas një takimi me këshillin e mbrojtjes shëndetësore.
Duke filluar nga 3 janari, Franca do të prezantojë disa kufizime për një kohëzgjatje prej tre javësh, si ndalimi i ngrënies dhe pirjes brenda kinemave, teatrove, ngjarjeve sportive ose transportit publik, duke përfshirë transportin në distanca të gjata.
Mbledhjet e mëdha në natyrë dhe në ambiente të mbyllura do të kufizohen respektivisht nga 5,000 në 2,000 pjesëmarrës, ndërsa koncertet në këmbë do të anulohen. Klientët që dëshirojnë të hanë darkë në një restorant apo kafene duhet të ulen.
Puna nga shtëpia gjithashtu do të bëhet e detyrueshme “kur është e mundur” për të paktën tre ditë në javë. Castex tha se u takon udhëheqësve lokalë të vendosin nëse mbajtja e maskave jashtë duhet të kthehet në qendrat e qytetit.
Castex përsëriti qëndrimin e qeverisë se vaksinat janë çelësi për të kaluar këtë pandemi, të cilën ai e përshkroi si “një film pa fund”.
Duke filluar nga nesër, koha e nevojshme ndërmjet dozës së fundit të vaksinës dhe dozës përforcuese do të shkurtohet në tre muaj.
Qeveria pret gjithashtu një ligj të ri, që do ta kthejë lejen e shëndetit të vendit në një leje vaksine, që do të hyjë në fuqi duke filluar nga 15 janari. Ai do të ndalojë efektivisht personat e pavaksinuar të shkojnë në vende publike si kinema, teatro, restorante dhe kafene.
Më shumë se 51 milionë njerëz, ose 76.6% e popullsisë totale, në Francë janë vaksinuar plotësisht dhe më shumë se 22 milionë kanë marrë vaksinën e tyre përforcuese që nga sot.
Sipas të dhënave të Ministrisë së Shëndetësisë, Franca raportoi një rekord prej 104,611 infeksionesh me covid në ditën e Krishtlindjes, hera e parë që numrat e rasteve kaluan pragun e 100,000 që nga fillimi i pandemisë.
Qeveria do të rivlerësojë situatën e covid-19 në këshillin e ardhshëm të mbrojtjes shëndetësore më 5 janar.
Top Channel
