Protesta në Universitetin e Kolumbias, policia e Nju Jorkut arreston dhjetëra pro-palestinezë, u ngujuan në një prej sallave 01/05 08:25
Ushtruesi i detyrës së ndihmës Sekretarit amerikan të Thesarit, Paul Ahern deklaroi në Beograd që të gjithë ata të cilët SHBA-ja i sanksionoi duhet të thirren në përgjegjësi.
“Individët dhe kompanitë në cak të këtyre sanksioneve duhet të thirren në përgjegjësi ndërsa aktivitetet e tyre të cilat shkaktojnë destabilitet duhet të ndalën”, citon deklaratën e Ahernit më 16 dhjetor, Ambasada amerikane në Serbi.
Departamenti i Thesarit i SHBA-së, më 8 dhjetor i futi në listë të sanksioneve udhëheqësit e grupit të krimit të organizuar në Kosovë, biznesmenët, Zvonko Veselinoviç dhe individë të tjerë si dhe kompani, sepse siç thuhet shkaktuan destabilitet e veprimtari korruptive me çka u dëmtuan qytetarët dhe ekonomia e Serbisë dhe Kosovës.
“Presidenti Biden qartë bëri me dije se luftimi i korrupsionit është prioritet kryesor i SHBA-së. Departamenti i Thesarit do të vazhdojë t’i thërrasë në përgjegjësi protagonistët e korrupsionit kudo qofshin ata”, porositi Ahern Beogradin.
Siç sqarohet në njoftim, gjatë vizitës në Serbi nga 13 deri më 15 dhjetor, Ahern u takua me përfaqësuesit kryesorë të pushtetit dhe bizneseve derisa bisedoi për temat e interesit të përbashkët dhe rëndësisë për SHBA-në e Serbinë.
Ahern, njëkohësisht edhe zëvendësi kryesor i ndihmës Sekretarit të Thesarit amerikan në krye të Zyrës për parandalimin e financimit të terrorizmit dhe krimit financiar këtë javë do të vizitojë rajonin që të informohet se deri në çfarë mase krimi i organizuar dhe korrupsioni kërcënojnë stabilitetin dhe prosperitetin e Ballkanit Perëndimor, por sidomos për të parë se në çfarë mënyre SHBA-ja mund të ndihmojë në realizimin e prioriteteve strategjike të Serbisë në mënyrë që të bëhet shtet anëtar i Bashkimit Evropian, shkruan më tej.
Departamenti i Thesarit të SHBA-së futi në listë të sanksioneve, nënkryetarin e Listës Serbe, partisë kryesore serbe në Kosovë, Milan Radoiçiçin, biznesmenët nga veriu i Kosovës, Zvonko Vesellinoviçin dhe vëllain e tij Zharko Vesellinoviçin, si dhe dhjetë persona të tjerë të lidhur me ta.
Vëllezërit Vesellinoviç, Milan Radoiçiç, Zhelko Bojiq dhe Marko Roshiç thuhet se iu takojnë rrjeteve korruptive të lidhura me krimin e organizuar ndërkombëtar.
Në reagimin e tij po të njëjtën ditë presidenti serb, Aleksandar Vuçiç tha se organet përkatëse serbe do të hetojnë gjithçka nëse do të ketë “akuza serioze”.
“Gjithçka që pranojmë me çfarëdo treguesi që dikush kreu vepër penale, organet përgjegjëse do të jenë gati që menjëherë të verifikojnë gjithçka në tërësi”, deklaroi Vuçiç.
Në njoftimin e Ambasadës amerikane në Serbi më 16 dhjetor përmendet që, Paul Ahern përgëzoi vendin për rezultatet e përmendura në raportin e fundit të “Moneyval” i cili vlerëson arritjet në fushën e luftimit të shpëlarjes së parave dhe financimit të terrorizmit.
Në raportin e publikuar më 13 dhjetor organi i Këshillit të Evropës, “Moneyval” vlerësohet se Serbia avancoi masat në luftën kundër shpëlarjes së parave dhe financimit të terrorizmit duke treguar përparim të rëndësishëm në nivelin e bashkërendimit me standardet e Grupit operativ për aksione financiare./ REL
Top Channel
