Ambasadorja amerikane në Tiranë, Yuri Kim, ka përgëzuar shortin e hedhur nga Presidenca, në bashkëpunim me Këshillin e Lartë Gjyqësor, Këshillin e Lartë të Prokurorisë dhe Avokatin e Popullit për zgjedhjen e anëtarëve të rinj në KED.
Sipas ambasadores shorti transparent i djeshëm i hap rrugë plotësimit të Gjykatës Kushtetuese në fillim të vitit të ardhshëm, ndërsa shprehet optimiste për vazhdimin e Reformës në Drejtësi.
Diplomatja amerikane kujton se Gjykata Kushtetuese arriti kuorumin 1 vit më parë që mundësoi funksionalitetin dhe se veprimi i djeshëm i hap rrugën përfundimit të Gjykatës Kushtetuese në fillim të vitit 2022.
“Vazhdon zbatimi i Reformës në Drejtësi. Më vjen mirë që Zyra e Presidencës (në bashkëpunim me Këshillin e Lartë Gjyqësor, Këshillin e Lartë të Prokurorisë, Avokatin e Popullit dhe të tjerë) zhvilloi dje një short transparent për përzgjedhjen e anëtarëve të rinj të Këshillit të Emërimeve në Drejtësi.
Gjykata Kushtetuese arriti kuorumin 1 vit më parë që mundësoi funksionalitetin. Veprimi i djeshëm i hap rrugën përfundimit të Gjykatës Kushtetuese në fillim të vitit 2022. Inkurajojmë të gjitha institucionet përkatëse që të vazhdojnë përpara – pavarësisht pengesave – për zbatimin e reformës në drejtësi”, shkruan ambasadorja Kim në Twitter.
Presidenca zgjodhi dje me short anëtarët e rinj të Këshillit të Emërimeve në Drejtësi për vitin 2022. Përmes një procesi live janë zgjedhur 9 anëtarët e përhershëm dhe 6 anëtarët zëvendësues të KED.
Anëtarët e zgjedhur janë përfaqësues nga Gjykata Kushtetuese, Gjykata e Lartë, Prokuroria e Përgjithshme, Gjykatat e Apelit, Prokuroritë pranë Gjykatave të Apelit dhe Gjykatat Administrative.
Të pranishëm në hedhjen e shortit ishin përfaqësues të Kuvendit, përfshirë dhe opozitën, KLGJ, KLP, OPDAT-it dhe Avokatit të Popullit.
Anëtarët e zgjedhur:
Marsida Xhaferllari nga Gjykata Kushtetuese
Elsa Toska anëtarja e dytë nga Gjykata Kushtetuese
Altin Binaj anëtar zëvendësues nga Gjykata Kushtetuese
Anila Leka anëtare nga Prokuroria e Përgjithshme
Thoma Jano anëtar zëvendësues nga Prokuroria e Përgjithshme
Sokol Binaj anëtar nga Gjykata e Lartë
Sandër Simoni anëtar zëvendësues nga Gjykata e Lartë
Edlira Petri anëtare nga Gjykatat e Apelit
Enton Dhimitri anëtari i dytë nga Gjykatat e Apelit
Ritvan Hado anëtar zëvendësues nga Gjykatat e Apelit
Arta Marku anëtare nga Prokuroritë pranë Gjykatave të Apelit
Etjen Kapo anëtar nga Prokuroritë pranë Gjykatave të Apelit
Genti Xholi anëtar zëvendësues nga Prokuroritë pranë Gjykatave të Apelit
Klodiana Mema (Veizi) anëtare nga Gjykatat Administrative
Erarbër Madhi anëtar zëvendësues nga Gjykatat Administrative
Top Channel
