Komisioni i Sigurisë nisi me debate të forta punën për çështjen e Bujar Çelës, i cili i uroi kolegët për festat kombëtare, në grupin e komunikimit në Whatsapp me një foto të diktatorit Enver Hoxha.
Demokrati Ervin Salianji, kërkoi me ngulm një ndjesë publike nga socialistët, ndërsa kryetari i Komisionit Nasip Naço tha se ai si administrator i grupit të komunikimit në Whatsapp, ka tentuar t’i fshijë mesazhet dhe kur nuk ia ka dalë dot e ka nxjerrë deputetin Bujar Çela nga grupi.
Debati:
Ervin Salianji: Është në nderin tuaj dhe të komisionit, që për ngjarjen që ka ndodhur, të kërkoni falje dhe të distancoheni, sidomos për fyerjet që i është bërë gjithë shoqërisë shqiptare, por sidomos viktimave të komunizmit. Një anëtar i këtij komisionin ka turpëruar, jo komisionin por gjithë parlamentin dhe nuk mundet që në mbledhjen e parë të bëhet sikur nuk ka ndodhur asgjë. Nuk bëhet kjo, kërkohet ndjesë, ju distancoheni nga kjo dhe pastaj fillojmë mbledhjen në mënyrë normale. Pastaj vijojmë me rendin e ditës. Përderisa ishte në mbledhjen e këtij komisioni duhet të kërkoni ndjesë dhe pastaj flasim dhe vijojmë punën normal. Duhet të kërkoni ndjesë, sepse ka qenë në grupin zyrtar të komunikimit të këtij komisioni. Keni ju ndonjë reagim apo ndjesë për atë që ka ndodhur?
Nasip Naço: Zotëria në fjalë është anëtarë zëvendësues i këtij komisioni, pavarësisht se është në grupin e komunikimit. Kur jam vënë në dijeni të atij lloj komunikimi, kam dashur të kontaktoj, por nuk munda. Kam bërë të mundur për aq sa më lejonte mënyra e komunikimit për të fshirë komentet që ishin bërë. Në momentet që nuk arrija t’i fshija të gjitha e kam nxjerrë nga grupi. Grupin e administrimit e kam unë, e kam nxjerrë nga grupi. Pastaj ka një njoftim nga kreu i grupit parlamentar që do t’i nënshtrohet Kodit të Etikës, ju keni bërë një kërkesë për Kodin e Etikës dhe do të thirret do të dëgjohet brenda rregullave të jap dhe ai gjykimin e vet dhe pastaj mund të diskutojmë gjithë ditën. Është e drejta juaj për qëndrimet, por pa dëgjuar dhe atë zotërinë në Komisionin e Etikës, nuk mund të gjykoj më shumë. Aq sa kam bërë është tërheqje e vëmendjes dhe pse nuk është anëtarë i këtij komisioni por është zëvendësues.
Top Channel
