Ministri i Brendshëm, Blendi Çuçi, ka folur në mbledhjen e përbashkët të dy qeverive Kosovë-Shqipëri në lidhje me tre marrëveshjet që do të nënshkruhen mes dy shteteve.
Ministri thotë se marrëveshja e parë për lejet e qëndrimit do të lehtësojë jetesën në të dy anët e kufijve duke bërë të mundur që çdo qytetarë mjafton të plotësojë një formular për të marrë një leje 5 vjeçare, leje kjo që unifikon edhe lejen e punës për të dy palët.
Marrëveshja e dytë ka të bëjë me hapjen e kufirit midis Shishtavecit dhe Krushevës, ndërsa marrëveshja e tretë është ajo e lejeve të posaçme që do të marrin banorët për të lëvizur lirisht jo vetëm në pikat kufitare por do të përfitojnë shërbime të njëjta si në Kosovë edhe Shqipëri.
Përtej këtyre marrëveshjeve, Ministri Çuçi bëri të ditur se do të merren masa që në të dyja palët e kufirit do të vendosen sisteme kamerash në mënyrë që automjetet të identifikohen me anë të targave dhe qarkullimi do të bëhet pa ndalim.
Në lidhje me këtë çështje foli edhe Kryeministri Rama, duke u shprehur se: Nga sa raportoi ministri i Brendshëm lidhur me regjimin në kufirin kryesor, aty ku është dhe fluksi më i madh mund t’u themi me kënaqësi qytetarëve që vitin e ardhshëm do të kenë regjim të ri të kalimit të kufirit falë vendosjes së një kontrolli jo fizik, për ta do të mundësohet kalimi i kufirit pa ndalesë dhe ju takon agjencive të sigurive të të dy vendeve që të bëjnë analizat dhe të ndjekin çdo rast problematik. Ky është një hap jashtëzakonisht i rëndësishëm se është histori shumë e vjetër dhe e lodhshme dhe është një zgjidhje shumë e mençur për të evituar çdo lloj komenti dashakeq apo çdo lloj keqkuptimi.
Pjesë nga fjala e Ministrit Cuci:
Marrëveshja e parë ka të bëjë me lejet e qëndrimit, kemi bërë një kapërcim për të lehtësuar lejet për të jetuar në të dyja anët e kufirit të shqiptarisë duke bërë të mundur që çdo shtetas shqiptarë në Kosovë apo e kundërta mjafton të plotësojë një formular dhe të deklarojë një adresë të përshtatshëm dhe menjëherë pas asnjë procedurë merr lejen 5 vjeçare dhe i kalon leja e menjëhershme pa patur nevojë për aplikim tjetër. Më e rëndësishme është se tashmë kjo leje qëndrimi unifikohet me lejen e punës, të dy shtetasit tanë e kanë hequr në kurriz deri më sot, që pa asnjë document, as edhe një, vetëm kjo leje qëndrimi që merret me kaq lehtësi, çdo shtetas ka të drejtë të punojë në të dyja anët e kufirit, ska nevojë për asnjë document. Ky është një lehtësim shumë i madh dhe do lehtësoj qarkullimin e kapitalit njerëzor.
Marrëveshja e dytë ka të bëjë më hapjen e kufirit midis Shishtavecit Krushevës, s’do e përdorin më vendasit e dy vendeve por të gjithë shtetasit që duan të vizitojnë këtë trevë, kjo krijon një arterie tjetër për lëvizjen e kapitalit njerëzor e biznesit, turizmit dhe besoj se përfitimi do jetë i drejtpërdrejtë, qoftë nga pikëpamja ekonomike.
Marrëveshja e tretë është ajo që do të sjellë lehtësimin apo lejet e posaçme që do të marrin banorët e zonave për të lëvizur lirisht jo vetëm në pikat kufitare, të dy shtetasit e të dy anëve do të përfitojnë shërbime të njëjta edhe në Kosovë edhe Shqipëri, janë rreth 300 mijë banorë që do të përfitojnë drejtpërdrejtë, mund të ndjekin lirisht shkollën nga fillorja e deri në të mesme, mund të shkojë të punojë në të dy anët e kufirit pa pasur nevojë për asnjë leje.
Nuk është pjesë e marrëveshjes, por me kërkesën e dy kryeministrave, kemi marrë masa dhe s’do presim sezonin e verës kemi rënë dakord që do të vemë një sistem kamerash në kufijtë dhe qarkullimi do të bëhet pa ndalim, sa i takon identitetit të targave që kalon, pa pasur nevojë të kalojë në kufi. Kemi bërë edhe planin e punës, do jetë më shpejt se sezoni. Flukset e tjera para sezonit, duke përfshirë edhe festën kombëtare, ku lëvizja do të jetë me një fluks të shtuar, kemi dhënë porosi që të mos ketë kontrolle dhe asnjë pengesë për qarkullimin e shtetasve. Jemi në rrugë të mbarë.
Top Channel
