“Një mjet pa targa po blen vota”, zbulohen dëshmitë e pjestarëve të Strukturës së Mbrojtjes së Votës në PD

Struktura ishte prezantuar te shtabi elektoral në 21 Prill, ditë kur nisi patrullimet demonstrative në rrugët e Elbasanit me furgonët e loguar me simbolet e PD. Bashkimi i vullnetarëve ishte bërë mbi baza shoqërore. Secili kishte tërhequr dikë prej miqve. Pra, ata nuk njiheshin të gjithë mes tyre dhe kjo konfirmohet në dëshmitë e siguruara nga Top Story.

“Unë drejtoja njërën nga këto mjete dhe bashkë me mua ishin dhe dy shokët e mi. Ndërsa ne dy mjetet e tjera ishin persona të tjerë të cilët i njoh për fytyrë por jo me emra”u shpreh Erjon Demushi, Anëtar i Strukturës së PD-së

“Në dijeninë time nga fashikulli gjyqësor dhe çfarë deklarojnë personat që mbroj e ka bërë lidhjen personi Arjan Hoxha që është vetë i proceduar, kanë pasur një qëllim siç e thashë për ruajtjen e votës dhe për të bërë disa kontrolle nëse do kishte probleme në Elbasan duke qenë se ishin në shtabin e këtij qarku” u shpreh Redi Rama, Avokat

Furgonët ishin marrë me qira pikërisht në 21 Prill siç referohet në materialet e prokurorisë. Afati i përdorimit ishte deri në 26 Prill, pra të nesërmen e zgjedhjeve. Mjetet mbanin targat AA 772 TS, AA 346 TT dhe AA 349 TT. Furgoni me targën AA 349 TT ishte marrë me qira nga shtetasi Erlin Roçi, një emër shumë i njohur për drejtësinë. Në nëntor të vitit 2018 ai është arrestuar në Itali si pjesë e një organizate të trafikut të drogës. 3 vite më vonë, ai e gjen veten si aktivist në fushatën e selisë blu në Elbasan. Siç sqarohet në materialet e prokurorisë, Roçi dhe personat e tjerë kanë pasur autorizime nga selia blu për marrjen me qira të mjeteve për llogari të Partisë Demokratike.

“Është bërë traditë që partitë e mëdha politike kur shkojnë drejt proceseve zgjedhore bëjnë aleanca me krimin, e bëjnë të gjithë, madje zihen me njëra-tjetrën se kush do marë X të fortë” u shpreh gazetari, Ferdinad Xhaferri.

Strukturën për Mbrojtjen e Votave me persona të armatosur, opozita e justifikoi me presionet nga njerëz të inkriminuar të lidhur me krahun tjetër. Pikërisht rreth mesditës së 21 Prillit, vullnetarët e selisë blu ishin njoftuar për lëvizje të dyshimta të një mjeti tip ML pa targa në lagjen 5 Maji.

“Më ka telefonuar një koordinator i zyrave të lagjes “5 Maji”, i cili në dijeninë time ishte ish-oficer policie, i cili më ka ngritur shqetësim se në lagje po jepnin lekë kundrejt votave dhe kartave të identitetit, dhe kishin lista personash, persona që lëviznin me një automjet pa targa fuoristradë ML, por nuk më ka dhënë emra personash” u shpreh Arjan Hoxha, Kryetar i Strukturës së PD-së

Shtetasi E.M. me banim në Elbasan, të cilit nuk ia bëjmë publik identitetin për arsye sigurie, ka deklaruar se informacionin e përcjellë te Hoxha e ka siguruar nga koordinatori politik. 3 furgonët e Partisë Demokratike iu drejtuan zyrës elektorale në lagjen 5 Maji. Aty afër, konstatojnë në qarkullim mjetin e zi pa targa ku ndodheshin dy persona.

“Në këtë moment kemi parë se automjeti ML pa targa që ka ardhur aty dhe në momentin që çunat tanë ishin në rrugë, ata më kanë thënë se personat që ishin në fuoristradë ju kishin bërë video. Çunat tanë u kanë bërë me dorë mjetit ML të ndalonte dhe mjeti ka ndaluar” u shpreh Arjan Hoxha, Kryetar i Strukturës së PD-së

Nga mjeti tip ML zbritën shoferi Mehmet Greca, i njohur si Met Dafllaku dhe miku i tij Donald Zani i njohur me nofkën Nushi. Në dëshminë e dhënë në polici, Greca thotë se është shofer kamioni dhe është i padënuar më parë. Në fakt, ai njihet si trafikant i rëndësishëm kokaine në Britani dhe në vitin 2017 është dënuar me 6 vite burg. Greca u kap me 51 kg kokainë të pastër me vlerë 5 milionë paund. Pas kthimit në atdhe, gjatë fushatës elektorale atij i gjenden në makinë materiale të dyshuara për krim zgjedhor duke u vënë përballë aktivistëve të opozitës.

“Arsyeja e parë, dyshimi i parë nuk ka qenë pjesa mendoj se sepse a ka pasur material zgjedhore makina apo jo, por ka nisur për një video që ky shtetas Mehmet Greca, ai ka ardhur vetë i ka provokuar me makinë u ka ndaluar para furogonave, i ka filmuar ka ardhur për herë të dytë dhe në atë moment ka ndodhur konflikti kur ai është rikthyer” u shpreh Redi Rama, Avokat.

Top Channel