Lajçak bisedon me Kurtin e Vuçiçin për hapat e ardhshëm në dialog
01/09/2021 20:39
Dështojnë sërish negociatat në Bruksel mes Kosovës dhe Serbisë për dinarin serb! Bislimi: Takim i kotë, pa rezultat 18/04 17:48
Përfaqësuesi i posaçëm i Bashkimit Evropian në dialogun Kosovë-Serbi, Mirosllav Lajçak, tha se ka biseduar me kryeministrin e Kosovës, Albin Kurti, dhe presidentin e Serbisë, Aleksandar Vuçiç, për “hapat e ardhshëm” në dialogun për normalizimin e marrëdhënieve.
Takimet u zhvilluan në margjina të Forumit Strategjik të Bledit në Slloveni. “Kam zhvilluar dy takime të ndara, të rëndësishme dhe substanciale me presidentin e Serbisë, Aleksandar Vuçiç, dhe me kryeministrin e Kosovës, Albin Kurti”, shkroi Lajçak në Twitter.
Ai nuk dha më shumë detaje. Kurti tha se me Lajçakun ka biseduar edhe për marrëdhëniet BE-Ballkani Perëndimor dhe shtoi se procesi i zgjerimit të BE-së “nuk ka alternativë”. Nën ndërmjetësimin e Bashkimit Evropian, Kosova dhe Serbia janë në negociata për normalizimin e marrëdhënieve qysh në vitin 2011.
Kurti dhe Vuçiç janë takuar për herë të fundit në korrik, por pa shënuar ndonjë përparim në bisedime.
Një takim i ri midis tyre është paralajmëruar për këtë muaj, por data nuk është caktuar ende./REL
Top Channel
