![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Presidenti turk, Recep Tayyip Erdoğan ka deklaruar se Turqia është e gatshme të zhvillojë bisedime me talebanët nëse është e nevojshme.
“Nëse trokitet në derën tonë, ne do ta hapim atë për dialog”, u tha presidenti Erdoğan gazetarëve pas faljes së namazit në Stamboll, sipas Anadolu Agency (AA).
Erdoğan kritikoi botën perëndimore dhe vendet islame për mungesën e interesit dhe kujdesit të tyre për Afganistanin gjatë dy dekadave të fundit.
Ai pohoi se Turqia ka bërë përpjekjet e nevojshme për zhvillimin e Afganistanit dhe do të vazhdojë ta bëjë këtë.
Lidhur me valën e migrimit nga Afganistani pas marrjes nën kontroll të talebanëve, Erdoğan tha se Turqia po strehon rreth 300 mijë emigrantë afganë pa dokumente.
Talebanët morën kontrollin e Afganistanit pasi mbërritën në Kabul më 15 gusht, duke detyruar presidentin dhe zyrtarë të tjerë të lartë të largohen nga vendi.
Marrja e papritur e pushtetit ka shkaktuar një nxitim të largimit nga Afganistani, përfshirë civilët që ndihmuan ushtarët ose grupet e huaja të cilët kanë frikë nga hakmarrja e talebanëve.
Top Channel