Sherr për prona në familje dhe aksident me makinë/ Çfarë ndodhi 24 orët e fundit në Tiranë, arrestohet edhe 31-vjeçarja që…

Njëra prej tyre, Ina Sulejmani, u ndalua sepse ishte dënuar me 3 vite e katër muaj burg nga Gjykata e Apelit Tiranë për veprën penale “Vjedhja me dhunë”, e kryer në bashkëpunim.

Ndërsa një 20-vjeçar u kap me dorezë metalike në automjet. Gjatë kontrolleve, policia arrestoi edhe një 32-vjeçar që theri vëllain e tij për motive pronësie.

Ndërsa një 34-vjeçar u arrestua sepse shkaktoi aksident me pasojë plagosjen e dy personave, të cilët ndodhen në spital, jashtë rrezikut për jetën.

“Specialistët për Hetimin e Krimit në Komisariatin e Policisë Nr.1 bënë kapjen dhe ndalimin e shtetases Ina Sulejmani., 31 vjeç, pasi Gjykata e Apelit Tiranë, e ka dënuar me 3 vite e 4 muaj burg, ku ka për të vuajtur edhe 3 vite e 27 ditë burg, për veprën penale “Vjedhja me dhunë”, e kryer në bashkëpunim.

Nga specialistët për Hetimin e Krimit në Komisariatin e Policisë Nr.2 u bë arrestimi në flagrancë i shtetasit B. T., 20 vjeç, pasi gjatë kontrollit të mjetit me të cilin ky shtetas qarkullonte iu gjet dhe iu sekestrua një dorezë metalike.

Specialistët për Hetimin e Krimit në Komisariatin e Policisë Nr.4 bënë arrestimin në flagrancë të shtetasit V. I., 32 vjeç, pasi për motive pronësie ka goditur me një mjet prerës vëllain e tij shtetasin D. I., i cili ndodhet në spital, nën kujdesin e mjekëve.

Nga specialistët e Qarkullimit Rrugor u bë arrestimi në flagrancë i shtetasit A. M., 34 vjeç, pasi mbrëmjen e djeshme duke drejtuar mjetin tip “Renault” është përplasur me mjetin me drejtues shtetasin P. Zh dhe pasagjere shtetasen V. Zh. Si pasojë e aksidentit janë dëmtuar shtetasit P. Zh dhe V. Zh., të cilët ndodhen në spital, jashtë rrezikut për jetën”, njoftoi policia.

Materialet i kaluan Prokurorisë së Rrethit Gjyqësor Tiranë, për veprime të mëtejshme.

Top Channel