Pronari i një lokali në fshatin Bulgarec të Korçës është gjobitur, pasi mbajti lokalin hapur pas mesnatës dhe kundërshtoi forcat blu.
Ndaj 35-vjeçarit me iniciale H.B. u ngarkua masa administrative prej 1.000.000 lekësh.
Ndërkohë, me 10.000 lekë janë ndëshkuar dy klientë që ndodheshin në ato momente në lokal.
Njoftimi i policisë:
U konstatua duke ushtruar aktivitetin pas orarit të përcaktuar për mbyllje dhe nuk iu bind urdhrit të punonjësve të policisë, procedohet penalisht dhe ndëshkohet me masë administrative 1.000.000 lekë pronari i një lokali.
Ndëshkohen me masën 10.000 lekë edhe dy klientë të lokalit.
Shërbimet e komisariatit të Policisë Korçë, vijojnë kontrollet për zbatimin e planit të masave për garantimin e rendit dhe qetësisë publike dhe monitorimin e subjekteve që vijojnë të ushtrojnë aktivitetin e tyre pas orarit të përcaktuar për mbyllje, në kundërshtim me masat anticovid të vendosura nga organet kompetente.
Në zbatim të këtyre masave, shërbimet e Policisë, në fshatin Bulgarec, Korçë, kanë konstatuar të hapur jashtë fashës orare lokalin në pronësi të shtetasit H. B., 35 vjeç, banues në Bulgarec, i cili ka penguar punonjësit e policisë dhe nuk iu është bindur atyre gjatë plotësimit të formularit të aktit të konstatimit.
Në bazë të Aktit Normativ Nr. 3, datë 15.03.2020, është vendosur masa administrative 1.000.000 lekë për pronarin e lokalit, shtetasin H. B., si edhe janë ndëshkuar me masën administrative 10.000 lekë edhe dy klientë që u konstatuan në lokal.
Drejtoria Vendore e Policisë Korçë apelon për të gjithë pronarët/administratorët e lokaleve dhe qytetarët që të respektojnë masat anticovid dhe orarin e përcaktuar për ushtrimin e aktivitetit.
Top Channel
