Maturantët: Testi ishte bombë/ Protesta në të gjitha qytetet kërkohet që të ribëhet testimi

Shkodër

Dhjetëra maturantë të Shkodrës, mes tyre edhe nxënës të ekselencës, protestuan këtë të shtunë ndaj provimit të matematikës.

Sipas tyre, ushtrimet janë të kopjuara nga një provim në universitetin e Cambrige, ndërsa akuzuan edhe për presione gjatë procesit të testimit, nga ana e të deleguarve të Ministrisë së Arsimit.

Durrës

Maturantë të shkollave të mesme publike dhe jopublike në Durrës u ankuan se testi pati dhe ushtrime jashtë kurikulës së lëndës, si dhe fraza të pakuptueshme, duke aluduar për përkthimin e problemit me Sindin, përpos kushteve të vështira në të cilat kanë mësuar dy vitet e fundit për shkak të tërmetit e pandemisë.

Elbasan

Edhe në Elbasan, maturantët kërkuan një rivlerësim të testit dhe të shpërndarjes së drejtë të pikëve.

Fier

Në Fier maturantët protestuan të shqetësuar, se sipas tyre teza nuk i përmbahej nivelit të premtuar dhe se koha nuk ishte e mjaftueshme.

Korçë

Maturantët e Korçës thanë se prej një viti pjesën më të madhe të mësimit e kanë bërë online dhe më pak të alternuar, ndaj dhe për këtë arsye ata kanë pritur një test tjetër jo vetëm në lëndën e matematikës por edhe në provimet e tjera të maturës shtetërore.

Gjirokastër

Në Gjirokastër protestuesit kërkuan në emër të të gjithë maturantëve përsëritjen e provimit dhe thanë se do të vazhdojnë protestën. Disa prej tyre ngritën pretendime se shumë prej ushtrimeve nuk ishin punuar kurrë prej mësuesve në shkollë.

Top Channel