Rrëzimi i avionit në Lituani, ngrihen dyshime se mund të jetë i lidhur me sabotim 25/11 22:20
Prokuroria e re e BE-së e themeluar për të hetuar keqpërdorimet e buxhetit të BE-së, ka nisur një operacion, që sipas zyrtarëve, në fokus kryesor do të ketë hetimet për keqpërdorime të fondeve për rimëkëmbje nga pandemia e COVID-19.
Zyra e Prokurorit Publik Evropian (EPPO), e udhëhequr nga ish-shefja kundër korrupsionit në Rumani, Laura Koevesi, është zyra e parë e pavarur e BE-së që ka në kompetencë hetimet dhe ndjekjen penale të atyre që keqpërdorin buxhetin e BE-së.
Koevesi, përshëndeti nisjen e punës së EPPO si “një moment historik”.
“Ne kemi në shënjestër krimin ekonomik dhe financiar, pasi ky është kërcënim i zakonshëm për çdo shoqëri demokratike”, tha ajo në një konferencë për media në Luksemburg, ku është vendosur selia e EPPO-s.
Në kohën kur ka punuar në Rumani, Koesevi kishte paditur një numër rekord të politikanëve, ministra dhe zyrtarë tjerë të lartë për ryshfet.
Më 2018 ajo u shkarkua nga qeveria e majtë e Rumanisë me pretendimet se ka keqpërdorur pushtetin.
Kritikët thonë se shkarkimi i saj u bë për shkak të luftës së saj kundër korrupsionit.
EPPO përbëhet nga një ekip prokurorësh nga të 22 vendet pjesëmarrëse.
Anëtarët e BE-së, Suedia, Hungaria, Polonia, Irlanda dhe Danimarka nuk iu bashkuan projektit. Ky mekanizëm u krijua pas kritikave se ka pasur keqpërdorime të buxhetit të BE-së dhe sipas Andres Ritter, përfaqësuesi gjerman në EPPO, ato arrijnë shifrën rreth 500 milionë euro në vit.
Zyra ekzistuese e BE-së kundër korrupsionit – OLAF- është e dobët, pasi ajo vetëm mund t’iu rekomandojë shteteve ndjekjen e dyshimeve për vepra penale, por jo edhe t’i detyrojë ato. Ndërsa EPPO e ka fuqinë ligjore të dërgojë çështje të profilit të lartë drejtpërdrejt në gjykatat kombëtare.
Ekziston një “rrezik i lartë” i keqpërdorimit me fondet e rimëkëmbjes, i tha Koevesi agjencisë spanjolle të lajmeve EFE më 30 maj./REL/
Top Channel
