Tre persona kanë rënë në pranga në Korçë për vepra të ndryshme penale, ku njëri prej tyre ishte i shpallur në kërkim.
32-vjeçari S.F. u arrestua pasi ndihmoi persona që të kalonin në mënyrë të paligjshme kufirin.
Një 39-vjeçar po drejtonte makinën pa leje drejtimi dhe më pas ka kundërshtuar policët për ta shoqëruar në komisariat.
Ndërsa një 61-vjeçar, banues në fshatin Diellas të Pustecit tregtonte mall pa dokumentacion me automjetin tip “Volkswagen” dhe në magazinën që kishte iu gjet mall kontrabandë.
Korçë
Bien në prangat e Policisë tre shtetas, njëri prej të cilëve i shpallur në kërkim për veprën “Ndihma për kalim të paligjshëm të kufijve”. Dy shtetasit e tjerë, u ndaluan për vepra penale të kryera kundër autoritetit shtetëror, rendit publik dhe kontrabandës me mallra. Specialistët për Hetimin e Trafiqeve të Paligjshme dhe Narkotikëve pranë Drejtorisë Vendore të Policisë Korçë, në bashkëpunim me shërbimet e Komisariatit të Policisë Pogradec, bënë ndalimin e shtetasit në kërkim S. F., 32 vjeç, banues në Pogradec (me precedent të mëparshëm penal në fushën e krimeve kundër lirisë së personit). Ndalimi i tij u bë pasi, Gjykata e Rrethit Gjyqësor Pogradec, me vendimin e datës 14.05.2021, ka caktuar për këtë shtetas masën e sigurisë “Arrest në burg” për veprën penale “Ndihma për kalim të paligjshëm të kufijve”, kryer në bashkëpunim.
Specialistët e Sektorit për Policinë Rrugore në DVP Korçë, bënë arrestimin në flagrancë të shtetasit E. L., 39 vjeç, banues në Korçë. Shtetasi i mësipërm, është kapur në lagjen nr. 3, Korçë, duke drejtuar mjetin motor tip “Lifan” pa leje drejtimi, pa dokumentacionin përkatës dhe në momentin e shoqërimit për në ambientet e Komisariatit, 39-vjeçari, ka kundërshtuar punonjësit e policisë gjatë kryerjes së detyrës. Specialistët për Hetimin e Krimit Ekonomik-Financiar në DVP Korçë, bënë arrestimin në flagrancë të shtetasit V. N., 61 vjeç, banues në fshatin Diellas, Pustec.
Ky shtetas, u kap në lagjen nr. 17, Korçë, pranë tregut të shumicës, me automjetin tip “Volksëagen”, duke tregtuar mallra ushqimore pa dokumentacionin përkatës (faturë blerjeje malli). Nga veprimet e mëtejshme, gjatë kontrollit të ushtruar në magazinën që ky shtetas dispononte në këtë treg, iu gjetën e sekuestruan në cilësinë e provës materiale, mallra të tjera ushqimore të dyshuara si kontrabandë. Materialet në ngarkim të tyre i kaluan Prokurorisë pranë Gjykatës së Shkallës së Parë Korçë për veprime të mëtejshme.
Top Channel
