Vrasja e 20-vjeçares gjatë grabitjes/ Policia hedh dyshime: Pas ngjarjes së rëndë qëndron banda shqiptaro-greke! Autorët ishin…

14/05/2021 08:26

Një bandë e përbërë nga shqiptarë dhe shtetas grekë me bazë në periferitë perëndimore të Athinës dhe fushë veprimi në verilindje të saj, dyshohet se fshihet pas vrasjes së 20-vjeçares, Karolinë, mëngjesin e 11 majit në Glyka Nera.

Grupi hetimor ka dalë në përfundimin se grupi është i përbërë nga shumë anëtarë të specializuar për plaçkitje, të cilët gjatë grabitjes i dhunojnë ‘viktimat’ dhe më pas i lidhin ata me litarë.

Për t’i shpëtuar policisë, mediat greke shkruajnë se ata përdorin rrugica të vogla, duke shmangur bulevardet kryesore në mënyrë që të mos të hasen as më postblloqe policie ose të kapen nga kamerat në rrugë.

Raportohet se banda e zgjodhi rastësisht shtëpinë e çiftit të ri, Babis Anagnostopoulos dhe Karoline dhe prej disa ditësh vendosën që ta mbikëqyrin atë.

Pas ditësh, teksa kishin mësuar rutinën e tyre të përditshme dhe zakonet e tyre, ata më pas vunë në veprim planin e tyre monstruoz.

Analistët grekë thonë se autorët e ngjarjes pasi vranë 20-vjeçaren, nuk kishin për ta lënë të gjallë burrin e saj 32-vjeçar. Por kjo mrekulli ndodhi sepse ata menduan se ai kishte vdekur, pasi kur e kishin lidhur dhe ia kishin bllokuar gojën e ia kishin lidhur sytë, 32-vjeçarit i ra të fikët.

Policia vlerëson se autorët janë persona me elementë të thekuar anti-shoqëror përderisa e mbytën 20-vjeçaren. Ata analizojnë se në tentativën për të mbytur një person duhet kohë dhe në këtë moment ata kanë mundësi të tërhiqen. Por ata nuk e bënë këtë gjë duke i marrë jetën të resë.

Kjo tregon qartë qëllimin e tyre “për të vrarë”. Në një grabitje, qëllimi është paraja. Vrasja është e panevojshme për realizimin e këtij qëllimi, thonë ata. Nuk ishte e nevojshme të vritej për të arritur qëllimin.

Policia thotë se autorët mund të kenë përdorur drogë dhe në këtë mënyrë nuk kanë mundur të kontrollojnë reagimet e tyre.

Bashkëshorti i viktimës: E mora vesh që kishte vdekur vetëm kur erdhi policia dhe më liroi

Bashkëshorti i 20-vjeçares, Karolinë, e cila u vra nga grabitësit në Greqi ka treguar se e kuptoi që partneres së tij i kishin marrë jetën vetëm kur policia erdhi në shtëpi dhe e liroi.

“E kuptova që gruaja ime kishte vdekur kur policia erdhi dhe më la të lirë . Për fat të mirë, vajza ime është mirë. Kushdo që di diçka, jam i sigurt se do të ndihmojë”, tha ai.

Nga sa kanë hetuar deri më tani, autoritetet besojnë se autorët janë pjesë e një bande që kanë kryer edhe grabitje të tjera të dhunshme.

Rezultatet e laboratorëve mjeko-ligjorë të Policisë Greke për gjurmët e ADN-së dhe gjurmëve të gishtërinjve do të përdoren për të identifikuar autorët, ndërsa edhe rrobat e veshura nga viktima janë dërguar në forenzikë.

Top Channel