Përfundon seanca në Gjykatën e Lartë lidhur me pretendimet e ish Presidentit Trump për imunitet absolut 25/04 21:57
Të paktën tetë njerëz kanë vdekur e dhjetra të tjerë janë plagosur në një magazinë të agjencisë postare FedEx pranë aeroportit të Indianapolis në SHBA, teksa policia e shpalli ngjarjen “incident të humbjeve masive të jetës”.
Sulmuesi që hapi zjarr pa diskriminim në magazinën postare, më pas vrau veten, konfirmoi policia.
Zëdhënsja e policisë së Indianapolis, Genae Cook tha: “Kur oficerët arritën në vend, incidenti me armë ishte në vijim. Ne lokalizuam tetë njerëz me plagë armësh, të cilët u shpallën të vdekur në vendngjarje.”
Cook shtoi se ende nuk dihet motivimi i vrasësit dhe nuk është e qartë nëse ai ishte punonjës i impjantit.
Vrasësi kishte hapur zjarr me një automatik dhe dëshmitarët thonin se sulmuesi kishte ndjekur viktimat në vendet ku ata ishin fshehur.
Jeremiah Miller tha: “Pashë nga dera e hyrjes dhe një burrë me automatik po qëllonte në drejtime të ndryshme. Menjëherë u fsheha, nëna e një shokut tim më tha të futeshim në makinë”.
Ndërtesa u evakua pas incidentit dhe pamjet nga skena tregonin grupe punonjësish që ishin mbledhur jashtë saj.
Sipas raportimeve, dy nga të plagosurit po luftonin për jetën në spital.
Policia e Indianapolis shtoi se vrasësi ka vrarë veten, pa dhënë detaje të mëtejshme.
Top Channel
