14 mijë vaksinime në Durrës/ Java e ardhshme nis me vaksinimin e moshës 60 e sipër

10/04/2021 15:25

Deputetja Klodiana Spahiu ka inspektuar procesin e vaksinimit që po zhvillohet në qytetin e Durrësit.

Në qendër të qytetit është ndërtuar një tendë enkas për këtë proces, në të cilën funksionojnë 6 vende vaksinimi. Spahiu ka pyetur personat që kanë kryer vaksinimin nëse kanë patur ose jo shqetësime pas bërjes së vaksinës, duke i garantuar ata se nëse ndodh që të kenë shqetësime, ato janë vetëm të përkohshme dhe pa probleme për shëndetin e tyre.

Duke folur më pas për ecurinë e procesit të deritanishëm, Klodiana Spahiu tha se ne të gjithë e dimë se sa i rëndësishëm është ky proces dhe më vjen mirë që Durrësi deri tani ka arritur në 14 mijë persona të vaksinuar.

Spahiu iu bëri thirrje qytetarëve që të paraqiten pranë qendrave të vaksinimit sapo të njoftohen nga mjeku i familjes. Javën e ardhshme pritet që të nisë vaksinimi i personave me moshë 60 vjeç e lart. Deri tani, përveç stafit mjekësor që u vaksinua i pari,  janë vaksinuar të moshuarit me moshë 70+ si dhe arsimtarët, pedagogët dhe punonjësit e policisë.

Top Channel