“Drita në fund të tunelit po afrohet”, 100 mijë të vaksinuar deri më tani

Shifrën e bën të ditur Ministrja e Shëndetësisë, Ogerta Manastirliu, nëpërmjet një postimi në Twitter, ku thotë se drita në fund të tunelit, po afrohet çdo ditë e më shpejt.

“100 mijë të vaksinuar deri sot. 100 mijë jetë më të mbrojtura. Çdo ditë e më shpejt po afrohet drita në fund të tunelit”, shkruan Manastirliu.

Kryeministri Edi Rama gjatë inspektimit të procesit të vaksinimit në Laç , tha se synimi është që të bëhen 30 mijë vaksinime në ditë.

Sot u shënua dita e tretë e vaksinimit masiv në të gjithë vendin për moshat +70 dhe +75 vjeç, ndërsa për më të moshuarit vijon në të gjithë qendrat shëndetësore të vendit.

Sipas autoriteteve, objektivi është që brenda majit të jenë vaksinuar gjysmë milioni shqiptarë.

Sinovac mund të kryhet mbi moshën 18 vjeç e lart pasi vetëm Pfizer dhe Moderna ka nisur studimet për tu aplikuar edhe tek fëmijët. Antitrupat me Sinovac mund të krijohen brenda dhjetë ditëve të para pas dozës së parë, ndërkohë që doza e dytë mund të kryhet jo më afër se një muaj nga doza e parë por mund të shtyhet edhe më shumë. Për të katër vaksinat që janë në Shqipëri, pra Sinovac, Sputnik, Pfizer dhe AstraZeneca, Bino thotë se janë të efektshme ndaj Covid. Por me këto ritme të vaksinimit, kur Shqipëria mund t’i kthehet normalitetit?

Silva Bino: Ne jemi në garë me kohën për të vaksinuar sa më shumë, sidomos me dozën e parë, në mënyrë që të arrijmë një mbulesë të mirë vaksinave. Në qoftë se ne do të kemi këtë furnizim me vaksina, të cilat do të vijnë sipas marrëveshjeve në kohën e duhur, besojmë se deri në fund të qershorit të kemi të vaksinuar të paktën 40% të popullatës.

Duke qenë se synohet lehtësimi i turizmit në këtë sezon do të vaksinohen edhe ofruesit e shërbimeve, hoteleve dhe restoranteve.

Top Channel