Muzeu etnografik dhe shtëpia Kadare janë dy muzeume që po qëndrojnë përkohësisht të mbyllur në Gjirokastër. Të dy këto objekte të rëndësishme janë në restaurim.
Ilir Lluri: “Janë të dyja pothuajse në një restaurim total. Në fund do të fitohet zgjidhje jo vetëm sa i takon kushteve që janë të domosdoshme për t’ju krijuar një vizitori në kohën që viziton një muze si ngrohja, ftohja por më e rëndësishmja është edhe në drejtim të mundësive komunikuese që vizitori do të ketë me trashëgiminë tonë.”
Ka dy sfida e para e lidhur me shtëpinë e Kadaresë e cila ka përfaqësuar një shtëpi të zakonshme e ndërtuar me një stil inovativ por me pak interaksion për vizitorët brenda saj dhe e dyta me shtëpinë e ish diktatorit Enver Hoxha e cila është fshehur herë pas here nën korracën e muzeumit etnografik. Do të duhet të zgjidhet përfundimisht nëse ky objekt do të mbajë një identitet apo dy identitete dhe kjo ka shumë rëndësi për vizitorët.
Ilir Lluri: “Unë gjykoj se do të vazhdojë me të dy identitetet. Shoqëria shqiptare ka ende kohë përpara për të ardhur në atë emancipim që ne të mos e fshehim të keqen. Po Enver Hoxha është dënuar moralisht dhe ne nuk mund të fshehim qoftë këtë të keqe që i ka bërë vendit të vet dhe asaj pjesë të shoqërisë që përbënte elitën e kohës.”
Gjirokastra trashëgoi nga e kaluara e socializmit një rrjet të degraduar muzeumesh që nuk plotësojnë as standartet minimale të sigurisë, funksionalitetit dhe që kanë probleme madhore të konceptimit dhe të përmbajtjes.
Top Channel
