Xhuljeta Lala, 33 vjeçarja nga Divjaka ka gjetur vdekjen mesditën e djeshme në një hotel në Bruksel.
Sipas familjarëve të Lalës, ngjarja ka ndodhur rreth orës 12, kur Xhuljeta ka qenë duke punuar si çdo ditë në një hotel në Bruksel ku merrej me pastrimin e tij kur një person i ka shkuar nga pas dhe e ka goditur me një bombul që shërbente për fikjen e zjarrit.
Kjo goditje, sipas familjarëve i ka shkaktuar vdekjen e menjëhershme. Ka qenë policia ajo që ka njoftuar motrat dhe vëllain e Xhuljetës për ngjarjen e ndodhur. Pas ngjarjes mësohet se policia ka arrestuar autorin dhe e ka klasifikuar si njeri me probleme të shëndetit mendor.
Daja i viktimës, Trifon Caponi ka zbuluar për gazetarin e Top Channel, Bledar Korreshi se si e mësuan lajmin e hidhur duke thënë: “E pamë direkt nga Facebook lajmin, e morën vesh dynjaja pastaj ne se unë s’para shoh mirë. Ishte njeri punëtor, i thjeshtë. Iku si njeri i zakonshëm për punë, me të drejtat e veta dhe të shtetit. Nga ora 11:30 duke pastruar në hotel, del një person në enigmë që e godet nga pas me këto bombolat e zjarrit.
Kolegia e saj, e cila ka qenë me fytyrë e ka parë dhe është larguar direkt. Kjo ka qenë me kurriz, ndaj e ka goditur direkt. Morëm vesh se e kanë marrë dhe e kanë çuar në spital, sot nuk e di çfarë kanë bërë tek morgue e të gjithë të tjerat.”
Xhuljeta Lala jetonte me vëllain dhe 3 motrat në Begjikë prej rreth 10 vitesh. Ata u larguan për një jetë më të mirë pas vrasjes së 2 prindërve nga një person nga Divjaka rreth 20 vite më parë. Për familjen, kjo është rihapje e plagëve dhe që i ka pikëlluar shumë.
Caponi ka rrëfyer historinë e hidhur të familjes që detyroi vajzat të emigronin larg Shqipërisë: “Para 19 vjetësh, një djalë Divjake i ka vrarë në një natë të dy prindërit dhe një nga motrat u plagos. Kjo që po flasim tani, me gjithë vëllain kanë hyrë poshtë krevatit dhe kanë shpëtuar nga plumbat atje. Fatkeqësia e gjurmoi atje. Direkt u larguan për Greqi, pastaj për në Belgjikë për një jetë më të mirë, larg këtyre gjërave që nuk mund t’i shikojmë dot me sy.
Atëherë kur ndodhi ngjarja, i kam kërkuar kryeministrit që ka qenë në detyrë atëherë, Pandeli Majko. I kam thënë që nuk dua vetëgjyqësi, por shteti ta kapë personin e ta varë para syve të të gjithë popullit. Pandeli Majko më është përgjigjur që ky ligj është hequr.”
Sa i përket pistës së hetimit, thotë se nuk mund ta hedhë dyshime pasi nuk kanë pasur debate me askënd. Ndërsa për versionin që jep policia, sqaron se: “Ka qenë një njeri me të meta mendore, i dalë nga psikiatria, ka hyrë në hotel dhe ndodhi kjo e papritur që na lëndoi neve për së dyti herë.”
Top Channel
