Lufta është drejt fundit? Burimi për CNN: Marrëveshja e armëpushimit midis Izraelit dhe Hezbollahut është shumë afër 25/11 10:15
Një ditë pasi Azerbajxhani nisi stërvitjet ushtarake katër-ditore, edhe Armenia njoftoi se do të fillojë ushtrimet ushtarake të shkallës së gjerë më 16 mars.
Të dyja vendet, në fund të vitit të kaluar, u përfshin në një konflikt të armatosur për rajonin e Nagorno Karabakut. Në stërvitjet e Armenisë do të marrin pjesë 7,500 ushtarë, rreth 100 tanke dhe automjete të blinduara, rreth 300 artileri dhe sisteme anti-ajrore dhe avionë, tha Ministria e Mbrojtjes e Armenisë.
“Çdo stërvitje ushtarake ka qëllimin e qartë që të kontrollojë aftësinë mbrojtëse të trupave dhe përdorimin e përgjithshëm të burimeve ”, tha zëvendësministri i Mbrojtjes Arman Sarkisian, në një konferencë për shtyp. Një ushtar armen gjuan nga një artileri gjatë konfliktit ushtarak mbi rajonin e shkëputur të Nagorno Karabakut, më 4 tetor 2020. Sipas ekspertit ushtarak, Karen Hovhannisian, veprimi i Armenisë tregon se ky vend gjithashtu dëshiron të demonstrojë forcën e tij, pas humbjes në Nagorno Karabak.
Lufta në këtë rajon u ndal pas një armëpushimi të ndërmjetësuar nga Rusia që hyri në fuqi më 10 nëntor 2020. Armenia humbi pjesë të konsiderueshme të territorit që mbante nën kontroll.
Ndërkohë, më 15 mars, Azerbajxhani filloi stërvitjet e tij katër-ditore ushtarake me pjesëmarrjen e 10,000 trupave, rreth 100 njësi tankesh, automjete të tjera të blinduara, sisteme raketash dhe aeroplanë, duke përfshirë dronë. Ministria e Mbrojtjes në Baku ka thënë se stërvitjet do të mbahen në zona malore të paspecifikuara. Zëdhënësja e Ministrisë së Jashtme ruse, Maria Zakharova, tha më 12 mars se lojërat e luftës në Azerbajxhan nuk do të rrezikojnë “stabilitetin dhe sigurinë në rajon”.
Muajin e kaluar ministri armen i Mbrojtjes, Vagharshak Harutiunian tha se Rusia, e cila ka një bazë ushtarake në Armeni, po ndihmon Jerevanin të ristrukturojë dhe modernizojë forcat e saj të armatosura.
Më 26 shkurt, presidenti i Azerbajxhanit, Ilham Aliyev tha se Rusia duhet të ndalë ndihmën ushtarake ndaj Armenisë, raportoi TASS.
Top Channel
