Policia zbardh ngjarjen që ndodhi mes dy biznesmenëve pronarë të një kompleksi turistikë në Vilëbashtovë.
Mësohet se 32 vjeçari Kastriot Dema i cili u raportua një ditë më parë se qëlloi me thikë ish-bashkëshorten e tij italiane ka përfunduar edhe vetë në spital pas sherrit.
Dema ka ndërhyrë për të prishur festën e ditëlindjes së Karlotës dhe dy persona të tjerë që e goditën atë vetë, po ndiqen penalisht në gjendje të lirë.
Sa i takon Demës policia sqaron se ai është jashtë rrezikut për jetën, por në gjendje arresti pasi ka thyer masën e sigurisë “Arrest në shtëpi” gjatë konfliktit ndaj ish-bashkëshortes së tij, ndaj së cilës sipas versionit zyrtar të policisë ai ka ushtruar dhune fizike dhe psikologjike dy netë më parë.
Policia nuk jep të dhëna për gjendjen e shtetases italiane por njofton se u pajis me Urdhër të Menjëhershëm të Mbrojtjes.
Materialet i kaluan Prokurorisë pranë Gjykatës së Shkallës së Parë së Rrethit Gjyqësor Kavajë, për veprat penale “Dhuna në familje” dhe “Largim i të burgosurit nga vendi i qëndrimit” në ngarkim të shtetasit Kastriot Dema dhe “Plagosje e lehtë në bashkëpunim” në ngarkim të dy personave të tjerë që ndërhynë gjatë konfliktit.
Top Channel
