Dhendias për median greke: Kemi një marrëdhënie të sinqertë me Ramën

Kreu i diplomacisë greke i pyetur për vizitën e kryeministrit shqiptar në Athinë ka thënë gjithashtu se tashmë Greqia ka një marrëdhënie të sinqertë bashkëpunimi me Ramën me te cilin ai vetë pati  mundësinë të bisedonte gjerësisht për të gjitha çështjet bilaterale dhe rajonale.

“Sa i përket Hagës, ekipet përkatëse teknike po vazhdojnë punën e tyre me qellim që marrëveshja kuadër të nënshkruhet dhe dorëzohet sa më shpejt që të jetë e mundur pas zgjedhjeve  parlamentare në Shqipëri”, ka theksuar Dhendias.

Gjithashtu ai sqaron se të gjitha forcat politike shqiptare mbështesin faktin që çështja e  përcaktimit të kufijve detare midis dy vendeve duhet të zgjidhet në bazë të Ligjit Ndërkombëtar te Detit  nga Gjykata e Drejtësisë në Hagë dhe se kjo procedurë sipas tij është edhe një mesazh ndaj Ankarasë.

Ministri i Jashtëm grek pohon se është veçanërisht e dobishme të kujtojmë se Z. Rama ka deklaruar që Greqia ka të drejtën e patjetërsueshme të saj për të zgjeruar ujërat e saj territoriale në 12 milje dhe se Shqipëria kishte bërë të njëjtën gjë 30 vjet më parë. Ndaj asnjë vend i tretë nuk mund të kundërshtojë këtë të drejtë ose të kërcënojë me luftë sipas tij.

Në pjesën tjetër të intervistës kryediplomati grek thekson rolin e rëndësishëm që përpiqet të luajë Athina në Ballkanin perëndimor për  konsolidimin e stabilitetit dhe paqes. Dhendias për Kathimerini tha: “Kemi një marrëdhënie të sinqertë me Ramën.”

Ai përmend vizitën e Bujar Osmanit në Athine javën e ardhshme dhe nënshkrimin e tre memorandumeve me Maqedoninë e Veriut si dhe proceset që kanë filluar për të forcuar më tej praninë  greke në Kosovë dhe në Bosnjë dhe Hercegovinë.

“Synimi ynë”,thotë Dhendias “është të krijojmë një kornizë të stabilitetit dhe qeverisjes ne shtetet e BP me qellim integrimin e tyre ne  familjen Evropiane, duke i mbrojtur nga depërtimi i rrjeteve ekstremiste dhe perceptimet neo-Osmane.”

Top Channel