Bora është nga qentë e paktë të mbijetuar pas një helmimi masiv që ndodhi për kafshët në pazarin e Gjirokastrës. Nuk dihet ende kush e ka kryer helmimin e qenve dhe maceve por ky akt ka nxitur irritimin jo vetëm të bizneseve në pazar por të shumë qytetarëve të cilët kanë kërkuar përgjegjësit me thirrje në rrjetet sociale.

“ Kjo ka ndodhur natën e 2 Dhjetorit pas orës 10 kur nuk lejohet më qarkullimi i njerëzve. Disa nga kafshët më të dashura të pazarit midis tyre dhe Xhina që e kishte shtëpinë atje nuk u gjet më në mëngjes. Tek kolibja e saj gjetëm shenja helmi. Këtë nuk mund ta bëjë një person i vetëm dhe mendoj se është diçka e organizuar. Kafshët e pazarit ishin pjesë e jetës sonë dhe i ushqenin të gjithë nga pak”

“ Sot në mëngjes e dëgjova pasi kisha blerë ushqim dhe shkova që t’ja jepja. Pyeta tek dyqani dhe më thanë që e kanë helmuar persona të bashkisë. Ata ndiqnin çdo person në pazar, kërkonin vetëm të ledhatoheshin. Nuk ishin aspak të rrezikshëm. Duhet të ngrihet dikush në këmbë për këto kafshë.”

“ Unë jam një nga personat që kujdesesha për këto kafshë. I kemi sjellë edhe tek shërbimet veterinare dhe ishin sterilizuar dhe vaksinuar gjithashtu kishim marrë masa për ushqimin dhe strehimin e tyre. Dje ka ndodhur një krim makabër. Është mbushur i gjithë pazari me një helm që dyshojmë se ishte Metonil 20. Sipas informacioneve që kam dhe sipas videove të bizneseve kemi fakte se kamionçina të bashkisë kanë ngarkuar qen të ngordhur dhe i kanë çuar në drejtime që nuk i dimë. Nuk po i gjejmë dot ku janë pra ka pasur një plan për tu vrarë në mënyrë të tillë.”

Ndërkaq bashkia e qytetit përmes shefit të Shërbimeve Seit Rondo ka pohuar se nuk ka asnjë urdhër për vrasjen e kafshëve apo helmimin e tyre në pazarin e Gjirokastrës apo në ndonjë zonë tjetër të qytetit. Kjo është hera e parë kur një kauzë që lidhet me mbrojtjen e kafshëve morri një përmasë të tillë në Gjirokastër çka tregon dhe rritjen e ndjeshmërisë së qytetarëve për mbrojtjen e kafshëve dhe gjetjen e zgjidhjeve më miqësore për ta.

Top Channel