Shefi i Pentagonit në detyrë, me mesazh kontradiktor mbi trupat në Afganistan

Por në paragrafin tjetër, ai shkruante “I jemi përgjigjur sfidës me sa kishim. Ka ardhur koha që trupat të kthehen në atdhe”.

Ekspertët, si dhe ish-drejtues të lartë ushtarakë, kanë shprehur shqetësim lidhur me momentin kur zoti Miller u ngarkua me detyrën e drejtimit të Pentagonit, pas shkarkimit të Sekretarit Mark Esper. Ata paralajmërojnë se kjo lëvizje ka krijuar përshtypjen e paqëndrueshmërisë dhe mund të çojë në politika të shpejtuara ushtarake.

“Gjatë muajve të ardhshëm, na duhen udhëheqës në Pentagon që janë të gatshëm t’u rezistojnë ideve të këqija që dalin nga Shtëpia e Bardhë dhe të punojnë nga afër me ekipin e tranzicionit të zotit Biden,” tha për Zërin e Amerikës Bradley Bowman, drejtor i Qendrës për Fuqi Politike e Ushtarake, një grup kërkimor pranë Fondacionit pë Mbrojtjen e Demokracive.

Ndër shqetësimet janë dëshira që ka shprehur Presidenti Trump për të tërhequr të 4,500 trupat amerikane që shërbejnë në Afganistan, ku SHBA vazhdojnë angazhimin prej afro dy dekadash në përpjekje për të parandaluar krijimin e bazave të sigurta pë al-Kaidën dhe grupe të tjera terroriste në atë vend, nga ku mund të ndërmarrin sulme ndaj SHBA dhe aleatëve të tyre.

Këshilltari i sapo-emëruar i zotit Miller, koloneli në pension Douglas McGregor, ka bërë thirrje për tërheqjen e plotë të trupave amerikane nga Afganistani, si dhe për mbylljen e ambasadës amerikane në Kabul.

“Mendoj se do të pendohemi për një tërheqje të shpejtuar nga Afganistani, jo vetëm nga ato që do të shkaktojë për partnerët tanë afganë dhe në koalicion, por edhe për arsye të sinjalit që përcjell për strategjinë tonë dhe rolin tonë si udhëheqës,” tha të premten një ish-zyrtar i lartë ushtarak për Zërin e Amerikës.

Një zyrtar amerikan, duke folur në kushte anonimiteti, thotë se tërheqja e shpejtuar, me ngut nga Afganistani brenda pak javësh “do të ishte e kushtueshme dhe shumë më e rrezikshme” se një tërheqje e planifikuar, e ngadaltë, bazuar në kushtet e sigurisë në terren.

Zyrtari shtoi se pajisje amerikane me vlerë prej qindra miliona dollarësh që janë aktualisht në Afganistan mbeten në pikëpyetje nëse ka tërheqje, pasi pajisjet duhen transferuar në duart e afganëve, një pjesë e pajisjeve duhen lëvizur nga Afganistani dhe disa të tjera duhen shkatërruar.

Muajin e kaluar, Presidenti Trump tha se SHBA duhet t’i kthejë në atdhe para Krishtlindjes trupat amerikane që shërbejnë në Afganistan.

Pak më pas, këshilltari i presidentit për sigurinë kombëtare tha se komenti i presidentit në Twitter se të gjitha trupat do të kthehen në atdhe deri në Krishtlindje ishte “dëshirë” dhe jo urdhër ushtarak.

“Për momentin, jemi në atë rrugë me partnerët evropianë; ne u futëm në Afganistan së bashku dhe duhet të tërhiqemi së bashku. Jemi në rrugën ku në vjeshtë do të kemi 4500 trupa, ndërsa në janar e shkurt do të kemi më pak,” tha këshilltari për siguri kombëtare Robert O’Brien më 16 tetor.

Zoti Miller, ish-drejtor i Qendrës Kombëtare të Kundërterrorizmit u emërua sekretar i mbrojtjes në detyrë pasi Presidenti Trump shkarkoi papritur shefin e Pentagonit, Mark Esper. Ky akt u njoftua me një koment në Twitter pasi shefi i personelit të presidentit e mori në telefon zotin Esper për ta informuar se ishte shkarkuar, thotë për Zërin e Amerikës një zyrtar.