Gjykata e Durrësit ka lënë të lirë dy nga zyrtarët e Autoritetit Rrugor Shqiptar, të arrestuar gjatë operacionit ”Bypass”, ndërsa nuk e ka ndryshuar masën e sigurisë ”arrest në shtëpi” për një të tretë.
Lekë Tushaj, drejtor drejtorie pranë ARRSH, Kastriot Braha, inxhinier në ARRSH dhe Agron Hasa, inxhinier (arrest shtëpie) u arrestuan të mërkurën në kuadër të operacionit policor ”Bypass”.
Të mërkurën, policia ekzekutoi masat e sigurisë ndaj 3 personave dhe shpalli në kërkim 6 të tjerë. Shtatë prej personave nën hetim janë zyrtarë të ARRSH-së dhe akuzohen për ”shpërdorim detyre” në bashkëpunim, ndërsa dy të tjerë janë ndërtues dhe akuzohen për ”Dhënie ndihme për ndërtim të paligjshëm”.
Gjykata e Durrësit, përfaqësuar nga gjyqtari Petraq Ccurri, në seancën për vleftësimin e masave të sigurisë vendosi sot ”detyrim paraqitjeje” për Tushajn dhe Brahan, duke i liruar në sallën e gjyqit, ndërsa la ”arrest në shtëpi” inxhinierin Hasa.
Teksa policia e Durrësit ka deklaruar se vijon punën për kapjen e personave të tjerë të përfshirë në këtë veprimtari kriminale, që lidhet me ndërtimin e një pike furnizimi me karburant në autostradën Plepa – Kavajë, gjykata ndryshon masën e sigurisë për të arrestuarit e deritanishëm të prokurorisë dhe policisë.
Hetimet nisën pas një sërë aksidentesh të regjistruara në afërsi të pikës së karburantit të ndërtuar duke cenuar barrierat dhe devijuar projektin e autostradës me pretendimin se rruga kalon në tokë private.
Në kërkim:
Dhurata Lazaj, inxhiniere në ARRSH
Afërdita Basha, inxhiniere ARRSH
Spartak Tarkaj, zyrtar i lartë ARRSH
Astrit Zenelaj, zyrtar i lartë ARRSH
Rezart Arkaxhiu, ndërtues
Xhevat Vataksi, ndërtues
Top Channel
