Një pikë larg vendit të fundit, Tirana shkarkon Bledi Shkëmbin nga stoli bardheblu 05/11 12:13
Los Angeles Lakers i kanë shkuar pranë titullit kampion në NBA, pasi ia kanë dalë të fitojnë me shifrat 102-96 në finalen e katërt ndaj Miami Heat dhe të çojnë në 3-1 rezultatin e përgjithshëm, teksa tani janë vetëm një fitore larg triumfit.
Miami Heat kishte fituar ndeshjen e kaluar, duke rihapur llogaritë, por dyshja LeBron James dhe Anthony Davies u ngjitën sërish në piedestal, pasi treguan një formë të jashtëzakonshme këtë mbrëmje dhe i dhanë Lakers fitoren e tretë.
Në “Advent Health Arena” të Orlandos u zhvillua një sfidë mjaft interesante, që nisi mjaft mirë për Lakers. Miami u fut në lojë vetëm në fraksionin e dytë, kur për disa momente mori edhe kryesimin e ndeshjes, por më pas ishin sërish kalifornianët që dominuan dhe sigluan fitoren.
LeBron James ishte absolutisht më i miri i takimit, me 38 pikë të shënuara, 12 topa të rikuperuar dhe 8 asiste, ndërsa një ndeshje mjaft të mirë bëri edhe Anthony Davies me 22 pikë të shënuara, 9 rikuperime dhe 4 asiste.
Mbeti disi më në hije heroi i Miamit në ndeshjen e kaluar, Jimmy Butler, i cili shënoi 2 pikë, rikuperoi 10 topa dhe dha 9 asiste, duke qenë më i miri mes të tijve, por pa ia dalë të udhëheqë Heat drejt një tjetër suksesi.
Përballja e radhës do të zhvillohet në mbrëmjen e 9 tetorit (mëngjesin e 10 tetorit me orën shqiptare), sërish në “AdventHealth Arena” të Orlandos dhe Lakers mund të kurorëzohen kampionë, nëse do të marrin një tjetër sukses.
Top Channel
