Provoi se ishte vajza e ish-mbretit të Belgjikës, 52-vjeçarja kërkon titullin mbretëror

11/09/2020 14:44

Një grua që me sukses çoi deri në fund një betejë ligjore për të provuar se ajo ishte vajza e ish-mbretit të Belgjikës, Albert II, do të mësojë muajin tjetër, nëse përkundër dëshirës së babait të saj do të mundet apo jo të përdorë titullin, Hirësia e saj mbretërore dhe Princesha e Belgjikës.

Delphine Boel, 52 vjeçe, një artiste dhe skulptore, nëna e së cilës ka patur një aferë jashtëmartesore me mbretin Albert në vitet 1960-1970, argumentoi para një gjykate në Bruksel se ajo duhej të kishte mundësinë të përdorte mbiemrin e babait të saj biologjik, Saxe Coburg. Gjykata do ta japë verdiktin e saj më 29 tetor.

Mbreti Albert, 86 vjeç, që abdikoi nga froni belg në 2013, u detyrua të pranonte se Boel ishte e bija e tij pasi një gjykatë urdhëroi kryerjen e një testi ADN-je në janar. Boel që ka kaluar kohë me Albertin kur ishte fëmijë, ka kërkuar njohjen që më shumë se 20 vite më parë, por kërkesat e saj ishin refuzuar. Ajo nisi një betejë ligjore për të provuar atësinë në qershor 2013, pasi vajza e madhe e saj, Jozefin, u shtrua në spital me pneumoni dhe ajo ndjeu mungesën e babait të saj biologjik.

Pretendimi i Boel për njohje u kurorëzua vjeshtën e kaluar kur një gjykatë vendosi se Zhak Boel, nga i cili ishte rritur, nuk ishte babai i saj biologjik dhe i kërkoi një eksperti të kryente një test për të krahasuar ADN-në e saj me atë të mbretit Albert. Vetë ky i fundit pranoi të jepte një kampion, që provoi atësinë, pasi gjykata kërcënoi se do ta gjobiste me 5 mijë euro për çdo ditë që do të refuzonte. E duket se delfin nuk është kënaqur ende, dhe pas njohjes së atësisë kërkon edhe titullin mbretëror…

FOTO GALERI
1/4

Top Channel