Kushtet e vështira të shkaktuara nga pandemia e Covid-it po sjellin një fenomen të ri, ku qytetarë që në të shkuarën e tyre nuk kanë patur lidhje me krimin, po shfrytëzojnë bahçet e shtëpisë, në të cilat së bashku me perimet e stinës kultivojnë edhe kanabis sativa.
Këtë mënyrë ka përdorur edhe Agron Korriku këtu në fshatin Ahmetaq , që u bë shkak që së bashku me të, të arrestohen edhe dy vëllezërit e tij për kultivimin e 14 rrënjëve kanabis. Ai mbeti i papunë nga Covid-i sipas të ëmës, Xhumes.
“Ne nuk e dinim çfarë ishte, bashkë me domatet kishte mbjellë edhe atë bimën. Për një thes miell e ka bërë”, rrëfehet e ëma.
Ndërkohë 41-vjeçari deklaroi në gjykatë se kishte mbjellë 14 rrënjë kanabis së bashku me perimet e stinës pasi mbeti pa punë nga covidi.
Burime të Top Channel pohojnë se për 2020-ën janë asgjësuar 106 mijë rrënjë kanabis në të gjithë vendin, ndërsa operacionet vijojnë deri në fund të vjeshtës edhe kundër parcelave edhe ndaj bahçeve.
Top Channel
