Ligji për UÇK-në/ Reagon Vuçiç e ndërkombëtarët

Ai tha se, shqetësimet për këtë projektligj, ia ka shprehur edhe të dërguarit të BE-së për dialogun, Mirosllav Lajçak, duke i kërkuar që ta marrë në konsideratë këtë çështje. Vuçiç ka thënë se do të shikojë se si do të reagojë Brukseli, duke shtuar se “kjo çështje ka pasoja edhe brenda Prishtinës”.

“Kur i shoh ata që vijnë në bisedime dhe marrin mbështetjen e bashkësisë ndërkombëtare, unë shoh që qëllimi i gjithçkaje është që Serbia ta njohë Kosovën”, ka thënë Vuçiç.

Deputetët e Kuvendit të Kosovës, shqyrtojnë sot projektligjin për mbrojtjen e vlerave të luftës së Ushtrisë Çlirimtare të Kosovës. Projektligji i propozuar nga Partia Demokratike e Kosovës, parashikon përcaktimin e obligimit institucional dhe qytetar për mbrojtjen e vlerave të luftës së UÇK-së. Shkelja e dispozitave të këtij ligji sanksionohet sipas legjislacionit në fuqi.

Por edhe komuniteti ndërkombëtar ka shprehur shqetësim për këtë projektligj. Ambasadori i Shteteve të Bashkuara në Kosovë, Philip Kosnett, tha se Projektligji për mbrojtjen e vlerave të UÇK-së rrezikon të minojë lirinë e shprehjes. Ai ka theksuar se Shtetet e Bashkuara të Amerikës nuk janë “kundër UÇK-së”, dhe përkundrazi e kuptojnë se sot “Kosova nuk do të ishte shtet i pavarur pa përpjekjet e UÇK-së dhe organizatave të tjera rezistuese”.

Më herët, edhe ambasadori i Gjermanisë në Kosovë, Jorn Rohde, i ka bërë jehonë një postimi të Ambasadës Amerikane të bërë në fund të korrikut, në të cilin kritikohej projekligjit në fjalë. Ndërkaq, edhe Zvicra është e shqetësuar se Ligji mund të dëmtojë lirinë e shprehjes.

Top Channel