Gjermania, vendi më i admiruar/ Sondazhi i Gallup, lë pas SHBA, Kinën dhe Rusinë

27/07/2020 11:40

Gjermania është vendi më i admiruar në botë për të tretin vit radhazi duke e lënë SHBA në një betejë të ngushtë për vendin e dytë, me Kinën dhe Rusinë.

Sondazhi i përvitshëm i kryer nga Gallup, hedh kështu më shumë dyshime mbi deklaratat e sekretarit amerikan të shtetit, Mike Pompeo, të premten, se SHBA është e pozicionuar në mënyrë perfekte për të udhëhequr botën e lirë në një rivalitet të ri ideologjik me partinë komuniste kineze.

SHBA ka një shkallë globale mbështetjeje prej 33 për qindësh për 2019, vetëm një përqind para kinës dhe 3 përqind para Rusisë. Gjermania ndërkohë lë pas të treja këto vende me jo pak diferencë, me 44 për qind të mbështetjes.

Sondazhi ka përfshirë mijëra të rritur në 135 vende të botës dhe është kryer në 2019, para se koronavirusi të godiste. Pozicioni global i Uashingtonit, mund të dobësohet akoma më tej tani në kuadër të keqmenaxhimit të pandemisë që e ka bërë SHBA një nga vendet më të goditura nga sëmundja.

Presidenti amerikan, Donald Trump, në vazhdimësi ka pretenduar se ai e ka bërë SHBA të respektuar sërish në botë, por shifrat e sondazhit sugjerojnë të kundërtën. SHBA ka qenë vendi më i admiruar në botë, çdo vit të administratës Obama, me përjashtim të njërit, kur u rendit i dyte, me pak diferencë me Gjermaninë, në 2011.

Top Channel