Vuçiç: Zgjedhjet në Serbi po zhvillohen në një atmosferë demokratike

Presidenti Vuçiç, i cili udhëheq koalicionin “Për fëmijët tanë”, shprehu kënaqësinë e tij për procesin e votimit.

“Nuk ka pasur parregullsi serioze. Zgjedhjet po zhvillohen në një atmosferë demokratike. Ka pasur më pak incidente se kurrë më parë në epokën e demokracisë sonë shumëpartiake, parlamentare”, tha Vuçiç pasi shfrytëzoi të drejtën e tij të votës.

Përderisa bota lufton me pandeminë e koronavirusit të ri (COVID-19), mbi 6.5 milionë votues po hedhin votat e tyre në Serbi në zgjedhjet parlamentare, lokale dhe rajoneve autonome.

Mbi 8 mijë qendra zgjedhore, të cilat u hapën në orën 7 të mëngjesit, do të jenë të hapura deri në orën 8 në mbrëmje.

Maskat mbrojtëse dhe dorezat janë të detyrueshme për anëtarët e komisionit të qendrave të votimit, ndërkohë edhe votuesit janë këshilluar t’i mbajnë të njëjtat.

Sipas të dhënave të Komisionit të Zgjedhjeve të Republikës, deri në mesditë jehona e votuesve ishte 18,1 për qind.

Ndërkohë, rreth 140 vendvotime janë hapur edhe në Kosovë për zgjedhjet në Serbi.

Kreu i Komisionit Qendror të Zgjedhjeve (RIK), tha se në Kosovë të drejtë vote kanë rreth 100 mijë qytetarë.

Fletëvotimet dhe materialet e tjera zgjedhore u sollën në Kosovë nga Organizata për Siguri dhe Bashkëpunim në Evropë (OSBE), ndërsa ato do të merren në qytetet serbe Vranjë dhe Raska për t’u numëruar nga stafi i saj.

Top Channel