Ministria e Arsimit, Besa Shahini nëpërmjet një statusi në Facebook ka bërë me dije se është takuar me përfaqësues të Parlamentit të Nxënësve në lidhje me maturën shtetërore 2020.
NJOFTIM PËR MEDIA
Matura Shtetërore 2020, Ministrja Shahini takon përfaqësues të Parlamentit të Nxënësve
Shahini, nxënësve: “Në vijim, QSHA do të botojë më shumë resurse përgatitore që aftësojnë nxënësit në njohuri aplikative”
###
Ditën e sotme, Ministrja e Arsimit, Sportit dhe Rinisë Znj. Besa Shahini ka zhvilluar një takim me përfaqësues të Parlamentit të Nxënësve, me të cilët ka diskutuar mbi temën e nxehtë të provimit të Gjuhës shqipe dhe letërsisë.
Gjatë takimit, nxënësit përcollën në detaje para ministres të gjitha shqetësimet e maturantëve për provimin e maturës, por gjithashtu i shprehën asaj keqardhjen e tyre për ato pjesë të degraduara të protestës para ministrisë, që nuk përfaqësonin nxënësit tanë.
Ministrja Shahini nënvizon se ka informuar ata për rezultatet paraprake të pyetjeve tashmë të shumë-përfolura si ajo me “Turin” apo mbi kuptimin e fjalës “dlirnja” të Poradecit, që tregonin se mbi 10 mijë maturantë kishin gjetur përgjigjen e saktë tek secila. “Kjo do të thotë qartë se këto pyetje nuk kanë qenë me probleme, pasi siç na informon edhe QSHA, të tilla konsiderohen pyetjet me nën 10% përgjigje të sakta”, shprehet ndër të tjera ajo.
Në takim, Znj. Shahini ka siguruar edhe një herë përfaqësuesit e Parlamentit të Nxënësve që me analizën përfundimtare të rezultateve, QSHA do të bëjë rishpërndarjen e pikëve nëse rezulton se testi ka patur vështirësi më të madhe se sa njohuritë e nxënësve.
“Gjithsesi, pjesa më e vlefshme e bisedës tonë ishte kërkesa nga Parlamenti i Nxënësve që mësuesit të përqendrohen akoma më shumë në aftësimin e tyre për njohuri aplikative. Në këtë kuadër, unë u premtova se edhe QSHA do të punojë më fort në përgatitjen e nxënësve për provimet e maturës së vitit të ardhshëm duke botuar më shumë resurse përgatitore”, mbyll postimin e saj Ministrja Besa Shahini.
Top Channel
