“Turistët do të jenë të mirëpritur ta vizitojnë Greqinë këtë verë, por rregullat e distancës sociale do të mbeten në fuqi për t’i mbajtur njerëzit të sigurt nga koronavirusi”, tha ministri grek i turizmit, Harry Theocharis.
“Ne duam që njerëzit të vijnë në Greqi,” i tha ai Radio BBC-së. “Sigurisht që do të marrim masa paraprake përsa i përket kërkesave para udhëtimit, por edhe vetë udhëtimit, mënyrës së qëndrimit. Do të zbatohen rregullat e distancës sociale. ”
Theocharis tha se Greqia ka mirëpritur turistët për “më shumë se 50 vite” dhe “ne duam të vazhdojmë të tregojmë mikpritjen për të cilën jemi njohur shumë.”
Ai shtoi se turistët duhet të ndjehen të sigurt në Greqi, pasi vendi do të marrë masa paraprake të rrepta.
“Greqia është një vend i sigurt dhe në shumë raste shumë më i sigurt – më vjen keq ta them atë – se vendi juaj”, tha ai për BBC-në, median britanike.
Theocharis tha se shpreson që “teknologjia e shëndetit” të jetë më e avancuar me kohën kur fillon sezoni veror dhe të lejojë një përvojë më të sigurt udhëtimi.
“Ka shumë të ngjarë që ne do të kemi disa kërkesa para se të udhëtojmë,” tha ai, duke iu referuar sugjerimit që udhëtarët duhet të bëjnë një test koronavirusi përpara se të lejohen të hyjnë në Greqi.
Top Channel
