KE hap negociatat/ Ambasada amerikane: SHBA mbetet partner i Shqipërisë në çdo hap të këtij rrugëtimi

Përmes një postimin në faqen zyrtare të ambasadës, Sekretari i Shtetit Mike Pompeo theksoi se SHBA mirëpret vendimi e KE.

“Ne mirëpresim vendimin e Këshillit Europian për të çelur negociatat e anëtarësimit për Shqipërinë dhe Maqedoninë e Veriut. Shtetet e Bashkuara do të mbeten partneri juaj në çdo hap të këtij rrugëtimi.”, thuhet në mesazhin e Ambasadës.

“Shtetet e Bashkuara mirëpresin vendimin e Bashkimit Evropian për hapjen e negociatave të pranimit me Shqipërinë dhe Maqedoninë e Veriut. Ne mezi presim të thellojmë partneritetin tonë strategjik me Shqipërinë dhe Maqedoninë e Veriut, ndërsa ata fillojnë hapat e ardhshëm në rrugën e tyre perëndimore.

Ky vendim forcon më tej të ardhmen e Evropiane të Shqipërisë dhe Maqedonisë së Veriut. Gjithashtu nënvizon rëndësinë e Marrëveshjes historike të Prespës e cila i lejon Maqedonisë Veriore të përparojë në Bashkimin Evropian dhe qëllimet e saj TransAtlantike. Shtetet e Bashkuara do të mbeten një partner i palëkundur pasi të dy qeveritë ndërmarrin reformat e nevojshme për të forcuar sundimin e ligjit, përpjekjet e mëtejshme antikorrupsion, të rriten ekonomitë e tyre dhe të forcojnë luftën kundër krimit të organizuar.

Të dy vendet duhet të qëndrojnë të përkushtuara në axhendat e tyre përkatëse të reformës dhe Shtetet e Bashkuara do të vazhdojnë mbështetjen e saj të palëkundur për përpjekjet e tyre në këtë drejtim“, thuhet në deklaratën e Pompeo.

Ndërkohë dje Ministria për Punët e Jashtme përmes një deklarate për mediat tha se: “Me këtë vendim, Shqipëria ka hedhur një hap historik në rrugën e saj evropiane. Ky vendim, megjithëse i vonuar, është bazuar mbi meritën e progresit substancial të arritur me pesë prioritetet kyçe dhe do të nxisë më tej reformat në vend. Vendimi i Këshillit është më shumë se një shenjë besimi që i jepet vendit tonë, Shqipërisë. Në fakt, është një përgjegjësi shumë e madhe, të cilën Qeveria Shqiptare do ta realizojë duke përmbushur në kohë dhe si duhet të gjitha kërkesat, në përputhje me pritshmëritë e procesit të anëtarësimit në BE.

Vendimi i Këshillit është gjithashtu një njohje e qartë e përparimit të konsiderueshëm në zbatimin e agjendës së BE-së.

Ne mirëpresim miratimin nga Këshilli për vazhdimin e procesit të zgjerimit në bazë të Komunikatës së Komisionit për metodologjinë e re “Pasurimi i procesit të negociatave – Një perspektivë e besueshme në BE për Ballkanin Perëndimor”. Kjo do ta bëjë procesin më të besueshëm, të parashikueshëm dhe dinamik. Shqiperia është totalisht gati për të plotësuar kërkesat të cilat burojnë nga negociatat e anëtarësimit, sipas metodologjisë së re.

Veçanërisht mirëpresim mandatin që i është dhënë Komisionit për të realizuar dhe finalizuar procesin e shqyrtimit analitik të legjislacionit të BE-së, duke filluar me grupin e thelbësoreve.

Ne dëshirojmë të sigurojmë vendet anëtare të BE-së dhe institucionet e saj se Shqipëria do të jetë e përkushtuar plotësisht në përmbushjen në kohë të kushteve të kërkuara deri në Konferencën e parë Ndërqeveritare.”, thuhet në njoftimin e Ministrisë për Punët e Jashtme.

Sipas ministrisë, vendimi i Këshillit është një mesazh i shkëlqyer jo vetëm për Shqipërinë, por edhe për mbarë rajonin.

“Vendimi i Këshillit është një mesazh i shkëlqyer jo vetëm për Shqipërinë; në fakt është edhe një mesazh pozitiv për të gjithë rajonin, duke treguar se agjenda e zgjerimit funksionon akoma dhe se e ardhmja e rajonit është në familjen evropiane.

Shfrytëzojmë këtë mundësi për të shprehur falënderimet tona për shtetet anëtare të BE-së, për Këshillin Evropian, Komisionin Evropian, Parlamentin Evropian, Shërbimin e Jashtëm të BE-së, që bënë të mundur arritjen e këtij vendimi për perspektivën evropiane të Shqipërisë. Shqipëria do të vijojë agjendën e saj të reformave me përkushtim të palëkundur. Shqipëria do të luajë një rol konstruktiv në rajon dhe do të vazhdojë te bashkohet me Politikën e Jashtme dhe të Sigurisë së BE-së.”, përfundon njoftimin e saj Ministria e Jashtme.

Top Channel