Presidenti izraelit: Marrëveshja e armëpushimit me Libanin duhet të garantojë siguri për banorët e Izraelit verior 26/11 22:47
SHBA ka paralajmëruar mbi 59 milionë dollarë ndihmë humanitare shtesë për refugjatët Rohingya dhe komunitetet pritëse në Bangladesh. Zëdhënësja e Departamentit të Shtetit të SHBA-ve, Morgan Ortagus, në një deklaratë me shkrim tha se ndihma po ashtu do të mbulojë popullin Rohingya të zhvendosur brenda vendit dhe anëtarët e komuniteteve të tjera të prekura në Mianmar.
“Ky financim do të ndihmojë në adresimin e nevojave emergjente të mbi 900 mijë refugjatëve në Bangladesh, shumë prej të cilëve janë gra dhe fëmijë Rohingya nga shteti Rakhinë, Burma, si dhe nevojat e komuniteteve pritëse të Bangladeshit”, tha Ortagus. “Ky financim po ashtu do të sigurojë ndihmë për jetën e personave të zhvendosur brenda vendit, përfshirë Rohingya-t, si dhe anëtarët e komuniteteve të tjera të prekura në Burma, përfshirë ata që janë të prekur nga luftimet midis ushtrisë burmze dhe Ushtrisë së Arakanit”, shtoi Ortagus.
Që kur forcat e Mianmarit nisën një sulm ndaj komunitetit pakicë musliman në gusht të vitit 2017, i cili detyroi qindra mijëra të ikin dhe të kalojnë në Bangladesh, SHBA ka siguruar gati 820 milionë dollarë, përfshirë financimin e ri prej mbi 59 milionë dollarëve.
– Rohingya, popull i persekutuar
Populli Rohingya, i përshkruar nga Organizata e Kombeve të Bashkuara (OKB) si njerëzit më të persekutuar në botë, është përballur me frikën e rritur të sulmeve, pasi dhjetëra u vranë në dhunën e vitit 2012. Sipas organizatës Amnesty International, më shumë se 750 mijë refugjatë Rohingya, kryesisht fëmijë dhe gra, u larguan nga Mianmari dhe kaluan në Bangladesh, pasi forcat e Mianmarit nisën një goditje ndaj komunitetit pakicë musliman në gusht të vitit 2017, duke e çuar numrin e njerëzve të persekutuar në Bangladesh në më shumë se 1.2 milionë.
Sipas një raporti të Agjencisë Ndërkombëtare të Zhvillimit Ontarios (OIDA), që nga 25 gushti i vitit 2017, rreth 24 mijë muslimanë Rohingya janë vrarë nga forcat shtetërore të Mianmarit. Më shumë se 34 mijë Rohingya u hodhën në zjarr ndërsa mbi 114 mijë të tjerë u rrahën, tha raporti i OIDA-s, i titulluar “Migrimi i detyruar i popullit Rohingya: Përvoja e patreguar”. Raporti tha se rreth 18 mijë gra dhe vajza Rohingya u përdhunuan nga ushtria dhe policia e Mianmarit si dhe mbi 115 mijë shtëpi Rohingya u dogjën dhe 113 mijë të tjera u vandalizuan./AA
Top Channel
